أعرض لحضراتكم اليوم طريقتى الشخصيه لمعرفه الإناث العشار فى اليوم الثالث من التلقيح
قبل أى شئ عايز اقول ان الطريقه دى شخصيه وخاصه بى ولم اراها فى اى مرجع علمى او كتاب
انما هى نتاج لملاحظاتى الشخصيه على الأرانب
ولكن تطبيقها يحتاج لشروط خاصه جدا فى المربى وهى
1ـ انه يكون بيحب الأرانب
يعنى الأمر بالنسبه للمربى مش مجرد تربيه لتحسين الدخل والأرانب دى مجرد ادوات انتاج
2ـ قوه الملاحظه
لازم يكون المربى بيقضى معاهم وقت كافى لملاحظه تصرفات الأرانب ومعرفه أسباب هذه التصرفات
3ـ الصبر ثم الصبر ثم الصبر
واللى معندوش الـ 3 شروط دى يبقى بلاش يقرأ الموضوع لأنه هايتصور انه كلام فارغ وملوش لزمه
ندخل فى المفيد
الأول هانتكلم عن عصبيه الأرانب لأن كل نوع من العصبيه ليها سبب وليها تصرفات ظاهره
أنا لا حظت ان الأرانب ليها أكثر من نوع من العصبيه
عصبيه الجوع
ودى من ظواهرها انها بتقعد تخربش فى السلك وفى العلافه وفى الأرض
وعصبيه الولاده
ودى بتخليها بنفس الحاله اللى فاتت مع ويزيد عليها انها بتقعد تلف فى العين او فى المكان
وتدخل وتخرج من عشه الولاده وكأنها بتدور على مكان فاضى أو بتدور على أحسن حته تولد فيها
و عصبيه التعشير (لما تكون طالبه تعشير)
ودى اللى تهمنا ـ لما تكون طالبه تعشير بيكون وضعها مختلف شويتين
وتقعد تعمل حركات كده زى إنها تقعد ترفع جسمها لفوق أو تكون أشبه انها بتنط نطات خفيفه
بس هى مش بتنط هى بترفع ايدها وراسها وتنزلهم تانى
وتقعد تحط إيديها على سلك البطاريه وتنزلها تانى بس من غير ما تخربش فى السلك
بتحط ايها على السلك زى اللى بيحط ايه على المقام علشان ياخد البركه (عافانا الله واياكم من هذا الجهل)
وسواء كانت العلامات دى واضحه للمربى او غير واضحه للمربى خلينا فى المنطقه اللى احنا بنبحث فيها
إزاى تعرف ان الأرنبه عشار فى اليوم الثالث للتلقيح
(((بعد التلقيح)))
سلوك الأرنبه بيكون هادئ تماما وبينزل من أشد العصبيه لقمه الهدوء وبتنزل للهدوء الشديد ده بشكل تدريجى
أول يوم بعد التعشير بتكون منكمشه على نفسها وراقده على بطنها ولو قربت منها تجرى تنكمش فى حته تانيه
وتانى يوم بتكون أهدأ قليلا من اليوم الأول وممكن أقرب منها وماتجريش
تالت يوم بتكون فى قمه الهدوء (والدلع) على طول نايمه على جنبها (ومش بطنها) ومره تكون رافعه راسها لفوق
ومره تكون راكنه راسها على الأرض وعينها مقفوله نص ونص كأنها بتسبل عينها
وعلشان أقرب الموضوع ليكم بشكل اكبر بتلاقي الأرنبه زى العروسه الحامل اللى أول مره تحمل
وفى الشهور الأولى وعامله نفسها مش قادره وتعبانه وتقوم من هنا تقعد هناك يعنى الأرنبه بتكون فى نفس الحاله تقريبا من الدلع
هى الأرنبه بتكون زى كده بالظبط على طول نايمه وراكنه على جنبها وحركتها بطيئه ومدلعه نفسها على الأخر
لو لاحظت الحاجات دى على الأرنبه يبقى هى ان شاء الله عشار وده بيتأكد طبعا بالجس بعد كده
ملاحظاتى على الطريقه دى
1ـ هى ممكن تكون وسيله ممتازه للمربى اللى بيقدر يتابع سلوك الأرانب ويعرف أسباب السلوك
2ـ هذه الطريقه ليست بديل كامل عن الجس لأن الجس لابد منه ومش هانستغنى عنه
على اقل تقدير الأرنبه ممكن تكون تعمل نفس التصرفات وتكون فى النهايه حملها كاذب !!!
3ـ الطريقه دى ( بالنسبه لى ) نتيجها مؤكده بما يقارب الـ 100% بالنسبه للأمهات اللى بتكون لوحدها فى العين
أو معاها خلفات لسه مابتتحركش أما المهات اللى معاها خلفات بتجرى وراها وتتحرك فى العين
لسه مش بقدر احكم عليها حكم نهائى غير بالجس
يارب اكون عرفت اوصل ملاحظاتى بشكل جيد
بس ربنا يبعت المزرعه الكبيره الأول
محمد طويلهالثلاثاء أبريل 09, 2013 10:03 pm