منتدى الأرانب للجميع
كلمتين فى العلف - صفحة 3 343215

أهلا وسهلا بك زائرنا الكريم ، في منتديات الأرانب للجميع .
المرجو منك أن تقوم بتسجـيل الدخول لتقوم بالمشاركة معنا. إن لم يكن لـديك حساب بعـد ، نتشرف بدعوتك لإنشائه بالتسجيل لديـنا . سنكون سعـداء جدا بانضمامك الي اسرة المنتدى . مع تحيات الإدارة

كلمتين فى العلف - صفحة 3 Rabbit10


منتدى الأرانب للجميع
كلمتين فى العلف - صفحة 3 343215

أهلا وسهلا بك زائرنا الكريم ، في منتديات الأرانب للجميع .
المرجو منك أن تقوم بتسجـيل الدخول لتقوم بالمشاركة معنا. إن لم يكن لـديك حساب بعـد ، نتشرف بدعوتك لإنشائه بالتسجيل لديـنا . سنكون سعـداء جدا بانضمامك الي اسرة المنتدى . مع تحيات الإدارة

كلمتين فى العلف - صفحة 3 Rabbit10

منتدى الأرانب للجميع
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

منتدى الأرانب للجميع دخول

أول منتدى عربى رائد في مجال تربية الأرانب ومستلزماتها ... يضم صفوة خبراء المجال ويعتبر الوجهة الأولى لمربي الأرانب فى العالم العربي ، حيث يساعد أصحاب الأرانب والحيوانات بأمورتربيتها ورعايتها وكيفية التعامل معها ، تجد به أيضا كل ما يهمك عن الزراعة وتربية

كلمتين فى العلف

12052013
كلمتين فى العلف

السلام عليكم ورحمه الله وبركاته
فى البدايه بعتذر عن التأخير فى عرض الموضوع
لأنى كنت وعدت انى اكتبه من فتره واتأخرت شويه

وأحب أفكر الناس إنى لا مهندس زراعى ولا طبيب بيطرى
والموضوع ده هو نتاج قراءات وخبرات ونقاشات مع خبراء فى مجال التربيه

من غير مقدمات
الموضوع ده مكتوب علشان الناس تفهم يعنى ايه علف وبيتعمل ازاى ويتصنع ازاى
وإيه هو السر الحربى اللى المصنعين متمسكين بيه ومش عايزين حد يعرفه سر تركيبه العلف
لو عايز تصنع علف بنفسك كل اللى مطلوب من حضرتك وإنت بتقرأ الموضوع
دماغ رايقه - كوب شاى - ورقه وقلم - آله حاسبه

بسم الله نبدأ
فى الكتب العلميه بيحددوا خمسة أنواع من العلف
(تسمين ـ نمو ـ أمهات فارغه ـ امهات حوامل ـ امهات مرضعات)
أنا لاأشكك أبدا فى الآراء العلميه
فى كام نقطه اى واحد عاقل وبيفكر وعايز يعمل حاجه كويسه فى التربيه
لازم يسأل نفسه فيهم ومش هاروح يجيب العلف ويرمى للأرانب وخلاص
النقطة الأولى
العلماء اللى بيقسموا العلف ويقولوا كل نوع ياكل حاجه معينه محدش فيهم قال
الذكور تاكل إيه ولا هانسيبها من غير أكل !!!!!!!
يعنى انت حددت كل حاجه وأكلها وجيت عند الذكر ونسيته
النقطة الثانيه
الأرانب الفطام دى لما بتكون مع أمها قبل ما تتفطم وبعد ما تتم 15 يوم من الولاده
مش بتاكل مع الأم فى العلافه بتاعتها ؟
يعنى أرانب المفروض انها فى مرحله النمو وبتاكل علف مرضعات مع امها
ولا بتتعب ولا بيحصلها أى حاجه لأن لبن الأم بيحافظ عليها طبعا طيب بعد الفطام بتيجى الإسهالات و الإنتفاخات وصدمه الفطام وبنسبه 90 % تغيير العلف بيكون عليه العامل الأساسى فى الصدمه اللى بتحصل وحتى فى أول سطر لتعريف الإسهال عند الأرانب مكتوب
(( تحدث النزلات المعويه بصوره كبيره خاصه فى النتاج المفطوم حديثا
وذلك لتغير طبيعه الغذاء )) والمقصود طبعا من علف مرضعات لعلف نامى (لأنه كلام أكاديمى)
يبقى أغيره يعنى اجيب ليهم المرض بإيدى ؟
وبعدين هو من المنطقى إن أغير للأرنب 3 أنواع علف خلال 60 يوم قبل ما يتباع
النقطة الثالثة
لو اتكلمنا فى الـ 5 أنواع من العلف المكتوبين
سنجد 3 أنواع قابلين بشكل قوى جدا للإستغناء عنهم (أعلاف النمو وأعلاف الأمهات الفارغه والأمهات الحوامل) النوع الأول يتم الإستعاضه عنه بعلف التسمين والنوع الثانى يتم بدلا منهم التحكم فى كميات العلف المقدمه
يعنى لو بتأكل الأرانب أكل مفتوح وهاتحجز منها أمهات للإحلال يبقى هاتييجى عند عمر شهرين ونصف وتبدا تقللها من الأكل وتأكلها بنظام الوجبات وبدل 150 جرام فى اليوم يبقى كفايه 120 جرام لحد ما تتوصل 4 شهور وتشتغل معاك
ولما تتأكد إنها عشار تحطلها 150 ـ 180 جرام فى اليوم لحد ما تولد ممكن تأكلها وجبات برضه أو تفتح ليها لأكل على حسب أسلوبك فى التغذيه
وكمعادله بسيطه ـ مثال على أرانب الإحلال
أكل علف حافظه + استهلاك زياده للعلف = تكلفه زياده
أكل علف حافظه +استهلاك قليل فى العلف = تكلفه علف أقل + أرنب صحته تعبانه
أكل علف متكامل + استهلاك علف أقل من العادى = تكلفه معقوله + ارنب صحته كويسه
ده غير طبعا انك مش هاتلاقى فى السوق الـ 5 أنواع دول كل اللى هاتلاقيه (مرضعات وتسمين فقط لا غير) لو لقيت نوعين أصلا

## معضلة المرضعات والتسمين ##
أما النوعين الباقيين (أعلاف التسمين واعلاف الأمهات المرضعات )
قبل ما نتكلم فيهم شوف الجدول ده من كتاب د/ سامى علام تربيه الأرانب ورعايتها

كلمتين فى العلف - صفحة 3 570843336

ده جدول بيحدد الإحتياجات الغذائيه للأرانب بالنسب المئويه للـ 5 أنواع علف
(بروتين وألياف وطاقه ......... إلخ الحتياجات المطلوبه لكل مرحله عمريه )
خد شفطه من الشاى وركز كويس جدا
وقارن بين الإحتياجات المطلوبه لأرانب التسمين والإحتياجات المطلوبه للأرانب المرضعات
هتلاقى النوعين شبه متطابقين لا يوجد ادنى احتلاف إلا فى عنصرين
الألياف الخام ـ ونسبه الفيتامينات ( أ & د3)
والزياده الموجوده فى العنصرين هى زياده فى حدود المسموح به
والمربى الجيد سيفهم جيدا أن الزياده الموجوده لصالح أرانب التسمين
وبناء على الجدول الموضح نفهم أن الفرق بين أعلاف المرضعات والتسمين اللى تجار العلف بيصوروه للناس إنه فرق (كبير وضخم ومهول ) ما هو إلا حديث على اساس ضعيف جدا من الواقع لأنك رأيت بنفسك الفرق الذى يكاد لا يذكر بين النوعين
وفى حاله التفكير فيه يكون الفرق لصالح ارانب التسمين وليس ضدها
طيب كده وبعد ما عرفنا ان العلف ممكن اختصاره فى علفه واحده ياكل منها كل الأرانب والدنيا تمشى تمام
على ما تقرأ اللى فات تكون كوبايه الشى خلصت هات بقى الآله الحاسبه والورقه والقلم وتعالى نعرف هانعمل علف إزاى
تركيبه العلف هى أسهل ما فى الموضوع
ممكن تجيبها من على النت ومن الكتب ومن واحد جدع ومش بخيل يديلك التركيبه بتاعته
ومعانا ناس على المنتدى يكتبولك تركيبات ممتازه بس بعد ما تجيب التركيبه
هاتقدر تحكم عليها انها كويسه أو تعبانه إزاى ؟
ولو فيها عيب أو مشكله فى النسب هاتقدر تظبط النسب إزاى ؟
ولو قررت تعمل علف لنفسك هاتعمله ازاى ؟
بعد ما جبت الآله الحاسبه شوف الجداول دى
جدول ـ 1 ـ
جدول ـ 2 ـ
جدول ـ 3

الجداول دى فيها كل العناصر المستخدمه فى تصنيع الأعلاف بالكامل
سواء علف فراخ او أرانب أو مواشى أو خيول أو حمام أو أى غذاء حيوانى
بكل المواد موجوده بالجداول دى ومع معرفه الإحتياجات الغذائيه للأرانب المعروضه فى الجدول اللى فوق هاتقدر تعمل بنفسك اكتر من تركيبه علف وهاتتعب شويه وتحاول تعرف اسعار الخامات علشان تقدر تكون أفضل علفه باقل سعر ممكن
ولو انت شاطر فى برامج الـ إكسل يبقى استعمل
برنامج حساب مكونات العلف للمهندس / أحمد أبو غالى
ده رابط الموضوع بتاعه
[ندعوك للتسجيل في المنتدى أو التعريف بنفسك لمعاينة هذا الرابط]
ولو مش قد كده زيى يبقى استعمل الورقه والقلم والحمد لله انك مجهزهم من البدايه
طبعا كده خلاص إنت فرحان إنك مسكت المعلومات دى
يعنى مفيش حد هايضحك عليك بعد كده ويقولك العلفه دى حلوه ودى مش حلوه لأنك معاك تحليل المواد وتقدر تحسبها بنفسك والأكتر من كده كمان ممكن التفكير يوديك لمنطقه تانيه خالص
تعملك كوبايه شاى تانيه وتقول بس انا كده هاعمل علف بنسبه بروتين 30 % تخلى الأرنب يفور معايا فى اسبوع والمكسب يبقى كالريح المرسله و ................
حاسب يا عم إنت رايح فين
إنت نسيت الجدول اللى فوق ولا ايه الأرنب أخره 20 % بروتين اكتر من كده العلف يجيب نتيجه عكسيه تماما
واسلتم بقى الإسهالات والمشكلات المعويه ولو الدنيا عدت على خير يبقى اضعف الإيمان الأرنب مش هايكبر
يبقى قبل ما تختار عناصر العلف
لازم تعرف الأرنب بيحب إيه علشان تحطه فى العلف
ولازم تعرف خصائص كل ماده من المواد
يعنى لو حطيت مسحوق سمك ده بيعمل مشاكل للأرنب غير انه بيخلى طعم الأرنب سئ فى الأكل
ولو حطيت كسب عباد شمس لو اتخزن غلط بيزنخ بسرعه ويعمل سموم
وقبل ما تفضل ماده عن ماده تانيه لأنها ارخص مثلا شوف باقى النسب الموجوده فى المادة
الكالسيوم والأياف والدهون وغيرها يعنى العمليه لازم تكون بالحساب وبالورقه والقلم ومش بالدراع والفهلوه
وبعد ما عرفنا مكونات العلف وإزاى اقدر اعمل علف
لازم تعرف شئ مهم جدا جدا جدا
إن سر كل علفه مش فى مكوناتها إنما سر العلفه فى الإضافات اللى بيتم اضافتها للعلف عند التصنيع
أنا حاسس ان فى واحد بكل ثقه بيقول أيوه أيوه (بريمكس) العلف
لا يا عم المثقف مش البريمكس
ولمن لا يعلم البريمكس ده إضافات بيتم إضافتها للعلف عند الكبس وهى على نوعين
الأول / بريمكس أملاح - مختصه بالإحتياجات اللى ممكن تكون محدوده بس مطلوبه جدا للأرنب زى الحديد والنحاس والزنك والمنجنيز
وكتير من الشركات بتصنعه ليتم اضافته للعلف أثناء التصنيع من 1ـ2 كيلوا على كل طن علف
الثانى / بريمكس فيتامينات - زى فيتامينات أد3هـ وفيتامين ب المركب
ويضاف للعلف بنسبه 1- 3 كيلوا لكل طن علف
وفى بريكسيمات فيها الأملاح المعدنيه والفيتامينات مع بعض
يتم اضافتها نسبه 2-3 كيلوا لكل طن علف
كده خلاص إنت اطمأنيت إنك هاتروح للصيدليه البيطرى وتشوف البريمكسات اللى هناك وتقارن النشره بتاعتها بالجدول اللى معاك وتحطها على العلف والدنيا تمام صح ؟
لأ لسه الدنيا مش تمام قوى
البريمكسات دى انواع منها مصرى ومنها مستورد ومنها المضروب ومنها اللى مافيهوش غلطه
ومنها اللى بيتاثر بحراره المكبس ومنها اللى مايتاثرش
البريمكس النضييييييف هتلاقيه مستورد وغالى
أما المصرى رخيص وعلى قد ادينا بس ربنا ينجينا منه بيتاثر بالكبس وقيمته الدوائيه بتقل مع التصنيع ده غير انه اصلا كفاءته ضعيفه ومش زى المستورد
لحد كده وأى واحد عنده شويه خبره واطلاع فى التركيب مع شويتين صبر مع قراءة مواضيع وكتب متخصصه يقدر يعمل علف
ولكن للاسف جوده العلف اللى هايطلع من تحت إيده مش هاتكون 100% !!
مش لأنها علفه غير متوازنه ولكن لأن كل يوم بيمر على العلفه دى وهى عندك وهى بالحاله دى بيقلل من كافئتها الغذائيه والدوائيه !!!!
خليك معايا فى الكلام اللى جاى
وإسأل نفسك سؤال أيهم أفضل
### علف لايحتاج إضافات أم علف متكامل ###
إيه الفرق ؟
من السهل انك تعمل علفه نضيفه ومغذيه بس صعب تحافظ على العلفه يعنى ايه الكلام ده
وليه صعب احافظ عليها
لأن العلفه ناقصها شويه إضافات ليها خصائص وقائيه ودوائيه
ولازم تفرق بينها وبين الإضافات ذات الخصائص الغذائيه (اللى هى البريكسيمات)
والإضافات دى بيكون ليها أكثر من مهمه
الأولى / رفع كفائه العلفه
وكمثال (إضافه فيتامينات معينه للعلف بتحسن من معدل التحويل عن الأرنب)
الثانيه / الحفاظ عليها من نمو الفطريات أو السموم أو طول فتره التخزين
(بإضافه مضادات سموم وفطريات ممتدة المفعول )
الثالثه / تعويض النواقص الغذائيه فى العلف
لأنه من المتعارف عليه إن تكسير كتله الغذاء بيقلل من القيمه الغذائيه الموجوده فى الكتله مثال ـ لو معاك ثمره طماطم (كتله الغذاء) وأكلتها على بعضها هاتكون الفوائد الغذائيه أكبر من انك تقطعها بالسكينه وتاكلها
حتى علماء التغذيه بأكدوا دايما إنك لما تعمل سلاطه خضرا قطعها كبير وبلاش تقطعها قطع صغيره علشان قيمتها الغذائيه ما تنقصش كتير
نفس الفكره بالنسبه لمكونات العلف لما تدخل وتتهرس فى المكبس قيمتها الغذائيه بتنقص
ولابد من مواد تعويضيه تعوض النقص ده
ده غير بعض العناصر الوقائيه اللى بتحافظ على الأرنب وبتساعده انه يتحمل تقلبات الجو
والظروف السيئه للتربيه وغشم المربى

وغيرها من المميزات المطلوب تواجدها فى العلفه

طيب إيه هى المواد دى اللى بتحافظ على العلف ؟
لحد كده ومعنديش معلومه ولو عندى معلومه سامحونى مش هاعرضها لا على المنتدى ولا غير المنتدى
لأن هو ده سر تصنيع العلفه الحقيقى
أسماء المواد - أنواعها – الفرق بين كل شركه والتانيه – الفرق بين المحلى والمستورد – المواد المخلقه معمليا ويدويا لإعطاء كفاءه أعلى للعلف وللحفاظ على القيمه الغذائيه لمواد العلف والقيمه الوقائيه للإضافات
يعنى مضادات سموم
ومضادات فطريات
ورافعات كفاءه معرفش اسمها ايه
ومضادات حيويه طويله المفعول
ومثبطات لنمو البكتيريا
و......و.......و......و.......
ده غير ان المفاضله بين الشركات والأنواع والتركيبات بيحتاج خبره طويله جدا ومش هتلاقى حد يديلك الخبره دى إلا لو كان والدك وانت ابنه وهو اللى بيعمل العلف
ولازم تحضر كبس العلف بنفسك مره واتنين علشان تتعلم على اصول صحيحه
يعنى العلفه اللى بتتباع غاليه لما تكون من مصدر ثقه
( وده شرط مهم جدا - مصدر ثقه )
ويقولك إنها علفه متكامله وممكن تاخد منها فى أى وقت تحتاج طالما عليها تاريخ صلاحيه وانتاج يبقى تصدقه وتجرب العلف وإن شاء الله هتلاقى كل خير

نرجع لسؤال مهم يعنى هو لازم الإضافات دى علشان نقول إن العلفه كويسه ؟
يعنى هايكون إيه الفرق بين العلف بالإضافات دى والعلف من غيرها ؟
وطبعا كمان هاتفكر إنك توفر النقل وهاتعمل العلف كل شهر ويمكن اكتر
حسبه اقتصاديه سليمه ولكن كفاءه العلف المصنع بالطريقه دى هاتفضل تقل كل يوم عن التانى وخلال 20 يوم بالكتير هايبدا يربى فطريات ماتنساش إن عليه مواد كفيله بإنها تخلى العلف يربى فطريات زى الزيوت وزى الأكساب يعنى خلال 20 يوم يبدا يربى فطريات مقبوله ومفيش منها ضرر وبعد كده هاتبدا الفطريات تتحول لفطريات ممرضه للأرنب وفى مرحله متقدمه شويه تتحول لسموم فطريه مميته للأرنب
بس دى مش قاعده اساسيه طبعا
لأن لو عندك مكان ممتاز للتخزين ( مكان نظيف - جاف – خالى من الرطوبه والفطريات والأتربه – محكم ضد التيارات الهوائيه – مؤمن تماما من الحشرات والفئران – مؤمن تماما من الندى والمطر – مؤمن من الشمس المباشره – فى وسط لطيف ومش حار ) يبقى العلف هايعيش معاك شهر كويس ويمكن اكتر كمان

طيب كل ده فهمناه
احتياجات الأرانب
تحليل مكونات العلف
إضافه البريكسمات
وفى النهايه لازم نستهلكه خلال اسبوعين وبالكتير 20 يوم !!!!!!!!
يعنى الناس اللى بتكتب على الشيكاره صلاحيه 6 شهور دى بتضحك علينا ولا ايه ؟
لأ ابدا الناس دى لما يكون عند المصنع ضمير فى تصنيع الشيكاره بيضيف عليها الإضافات اللى اتكلمنا عنها فعلا بتقعد 6 شهور مع التخزين السليم وممكن اكتر كمان
وأكرر عند المصنع اللى عنده ضمير
إنما عند المصنع اللى عنده نصف ضمير هايعمل كل حاجه تمام وهايحط بريكسيمات نضيفه
بس مش هايعوض نواقص العلف ولا هايضيف الإضافات اللى اتكلمنا عنها
والمصنع اللى عنده ربع ضمير هايحط إضافات مصريه متواضعه ويقولك انها مفيش بعد كده
والمصنع اللى معندوش ضمير ... بلاش نتكلم فى حق الناس

وطبعا دلوقت هانقدر نفرق بين اللى يقولك ـ بكل ثقه ـ العلفه دى مش محتاجه إضافات
(لأنه بيحط عليها بركسيمات)
وبين اللى بيقولك العلفه دى علفه متكامله
لأننا عرفنا مع بعض إيه هى حدود كلمه (متكامله) اللى بيتكلموا عنها

المعلومات اللى فى الموضوع نتيجه لقراءات وبحث فى مكونات العلف واساليب تصنيعه
ونقاشات مع خبراء فى التغذيه واصحاب مصانع وكيميائيين وبيطريين متخصصين
ويارب أكون وفقت فى عرض الموضوع بشكل وافى وأى نقاشات فيه أنا مستعد
وبإذن الله قريبا جدا أبدأ فى تصنيع إنتاجى الشخصى من العلف
لأنها حاليا مسأله وقت مش اكتر
فى حفظ الله


عدل سابقا من قبل a.abdelghani في الأحد مايو 19, 2013 12:30 am عدل 1 مرات (السبب : التثبيت)


ان يصلح الراعى ويتقى ربه ــ تخشى الذئاب ربوعه وحماه

خبرات خاصه فى تربيه الأرانب
كيفيه التعامل مع الإناث الرافضه للتلقيح
تدريب ذكور الأرانب للحصول على ذكر مثالى للتلقيح
معرفه الأنثى العشار من اليوم الثالث للتلقيح
ليس كل تساقط مع قشور يكون جرب
سقايه الأرانب الأوتوماتيك
كلمتين فى العلف
إصنع علفتك بنفسك
01111766393
[ندعوك للتسجيل في المنتدى أو التعريف بنفسك لمعاينة هذا الرابط]









شكرا لكل من رمانى بحجر

تعاليق

shehata2020
انا أسمع عن اكسترا انه كويس جدا
عبدالسلام عزت
تم النقل للقسم المتميز
محمد طويله
بروفيشنال سات كتب:
موضوع رائع بجد انا بقى مش هصنع حاجة انصحنى بقى بنوع واحد من الاتنين
1 - الايبكس

2 - اكسترا

هم دول اللى متوفرين عندنا فى الاسكندرية

صدقنى معنديش علم
بس لو كليه الزراعه باسكندريه قريبه منك ممكن تتفاهم معاهم
هناك هتلاقى الأساتذة الكبار فى العلف والتربيه
محمد طويله
عبدالسلام عزت كتب:
تم النقل للقسم المتميز

والله انت اللى متميز يا أستاذ عبد السلام
محمد المقود

جزاك الله كل خير (( محمد طويله ))
f]ولكن جدول التحليل الخاص بك ناقص لبعض المواد وكمان غير متطابق مع الجدول الخاص بى
ياريت لو تنزل لينا جدول متكامل لخامات العلف
ذره صفراء - كسب فول صويا 44 % - شعير - برسيك حجازى - رده - كسب عباد شمس - خميرة مولاس - مولاس قصب - نعناع - ينسون - حلبه

محمد طويله
فعلا الجدول ناقص
بس الحاحات اللى تتكلم فيها تعتبر ثوابت
بمعنى الحجازى فيه أكثر من نوع
طن بـ 1600 جنيه و طن بـ 1700 جنيه وطن بـ 1800 جنيه وطن بـ 1950 جنيه
وكل نوع ليه تحليل مختلف عن التانى

الينسون والنعناع والحلبه
أتبان لها مزايا ظاهريه أكثر من المزايا الحقيقيه
مثل الينسون له رائحه مهدئه للجهاز التنفسى الكراويه مهدئه للجهاز الهضمى
ولا يوجد بها نسب بروتين او طاقه او غيرهم
(لا اعلم شئ عن الحلبه للأمانه فى الحديث)
كسب العباد وكسب الصويا بييجى مستورد من بره
يعنى مش محتاج مقارنه بالظروف المصريه
والذره بأناعه والشعير اللى فى الجدول بتاعى هى المحليه وليست المستورده
علشان كده لما بروح المكبس بساله عن مصدر الخامات اللى ممكن يكون فيها اختلاف
مثل الذره لو كانت مصريه بزبط شغلى عليها ولو مستورده بزبط شغلى عليها
وهكذا
hamid20
برامج الاكسل بتدى نتايج مختلفة ,,, الاضمن هو الحساب اليدوى لكنه متعب جدا
محمد طويله
ولا متعب ولا حاجه
الأمر بس محتاج شويه تعود
عن نفسى لا اتعامل الا بالورقه والقلم
hamid20
كلامك مظبوط 100% يا أ/محمد
انا قلت متعب قبل ما اجرب اليدوى ,,لكن لما جربته لقيته ممتع للغايه

دى كيفية الحساب اليدوى :: لو فيه ملاحظات عليها ياريت تذكرها يا أ/ محمد
نسبة الالياف فى الصويا 7.3
7.3 /1000 = 0.0073 الياف لكل كيلو من العلف
0.0073* 185 = 1.3505

نسبة الالياف فى الدريس 25
25/1000=0.025
0.025*275=6.875

نسبة الالياف فى الرده الخشنه 12
12/1000=0.012
0.012*230=2.76

نسبة الالياف فى الشعير 6.3
6.3/1000=0.0063
0.0063*150=0.945

نسبة الالياف فى الذره 2.3
2.3/1000=0.0023
0.0023*60=0.138

نسبة الالياف فى تبن الشمر 30
30/1000=0.03
0.03*70=2.1
المجموع ====
14.1685
مهندس ابراهيم الشامى
جزاك الله خيرا ً على مجهوداتك القيمه والمفيده
مهندس ابراهيم الشامى
الحلبه

فوائد واستعمالات الحلبه
1. مغلي البذور يستخدم كمشروب مغذي ومدفيء شتاءا .
2. البذور الكاملة والمطحونة تساعد علي إدرار اللبن .
3. تساعد الحلبة علي تنظيم الدورة الشهرية .
4. تستخدم البذور في علاج السعال الديكي والربو وإلام البواسير والإمساك .

المكونات الفعاله:تحتوي بذور الحلبة علي بروتينات كربوهيدرات ومواد هلامية وأملاح مثل الفوسفور
محمد طويله
الف شكر لك ياباشمهندس
ويسعدنى او اول مشاركه لك فى المنتدى تكون فى موضوع خاص بى
وياريت نتشرف بوجودك الدائم معانا
drkb
بارك الله فيك
محمد طويله
شكرا لك
khalilabdo
جزاك الله خيرا وجعل جهدك في ميزان حسناتك .... أحيي هذا القلم البسيط العميق السلس المرتب المنطقي
تعبو الارانب
مشكور المجهود استاذ محمد
محمد طويله
khalilabdo كتب:
جزاك الله خيرا وجعل جهدك في ميزان حسناتك .... أحيي هذا القلم البسيط العميق السلس المرتب المنطقي


تعجز كلماتى عن الشكر أ/خليل
محمد طويله
تعبو الارانب كتب:
مشكور المجهود استاذ محمد


أشكرك جزيل الشكر استاذنا الكريم
ونتمنى نتشرف بالتعرف عليك
ابوعمر الفيوم
السلام عليكم ورحمة الله وبركاته كل الاحباء على المنتدى
احب اضيف لكم بعض الملاحظات في موضوع العلف
اولا : العلف اللي يعطيك نسبة تحويل من اكثر من 30 جرام في اليوم لارنب التسمين بيكون كويس
ثانيا : لو اضفت اي حبوب للارنب مع العلف هياكلها او لو وضعتها وحدها
ثالثا : وفر جو كويس وخلي بالك من الحاله الصحية لارنبك واستخدم علف مشهور ولكل مجتهد نصيب
رابعا: كل معلومه تعرفها في التربيه وثقها وجربها وتاكد من صحته وانت دايما هتكون للامام
خامسا: كل اللي م كملش في التربيه سنتين والقطيع بتاعه لم يقل عن 30 طول مندة السنتين اكيد ما يلزموش كل الكلام الكتير في الارانب لانه لم يجرب المعاناه اللي فيها المربيين الكبار ربنا يكون في عونهم ويعوض الخساير اللي خسروها بسبب .............طبعا كل واحد اكتشف اسبابه ايه رايكم نعمل موضوع ونسميه اسباب خسارتي
اكيد هنسمع قصص مولمه اقولك بعض الامثله كانت شراكه وفشلت او المهندس المتابع او العامل الله يسامحه او العلف والنصب اللي فيه او عدم الخبره او او او
نتكلم عن الجانب الايجابي
انه فيه ناس بتكسب كويس من الارانب يااااااااااااااااااااااااااااااااااااااااه فيه ناس بتكسب فين دول اه انا اعرف ناس بتكسب من تربية الارانب العدد 50 ام الربح الشهري حوالي 1500 جنيه صافي
المهم ياجماعة عايز اقول لكم اللي بيربي الارنب او شي اخر بياكل ويشرب لازم يعود نفسه على المكسب والخساره وبس ان ما عرفتش تكسب من مشروعك لمدة 6 شهور او على الاقل لم تخسر انصحك ابدء في تدارك الامر وغلق النزيف بانك تبيع الارنب بتاعك لان الخساره ستكون مستمره وبعدها ستقول ياليتني
وطبعا الكلام ده حصل مع ناس كتير جدا من اللي فتحو مشروع ارنب وخسرو كتير والقليل اللي ممكن تساله عن تربية الارنب ما يشتكي وانا عن نفسي اتمنى ان كل بيبت في مصر يربي الارانب لما فيها من مميزات غذائية وكائن جميل ومنتج بس المشكله لم بيكون مشروع وله حجم بتكون مشاكله على اقد حجمه
واللي بيفكر يربي ارنب وعايز يبدا لا انصحه يان يضحى باكثر من 5% من راس ماله حتى يفهم طبيعة المشروع ويتاكد من النيجه والربح لمدة سنه تحت التجربه وبعدين يكرر لو كان هيستمر او لا
عارف اني طولت عليكم
بس حبيبت اتكلم معاكم شويه يمكن حد يستفيد حاجه من كلامي فيدعو لي بظهر الغيب
وجزاكم الله خيرا على صبركم على قراءة الموضوع
M2T2015
شكراً أ. محمد طويلة علي الموضوع القيم
essam.turky.52
السلام عليكم
مشكور استاذ محمد على الموضوع الجميل ده
بس بعتقد ان مش كل المربيين هيعملو العلف لنفسهم
فى ناس زى حالاتى
شراء العبد ولا تربيته
او واحد مربى راسين تلاته عشره
معتقدش انه هيصنع علف لنفسه
و مش كل المقادير هيعرف يشتريها من السوق
بس كل ده لاينقص من مجهودك فى كتابة الموضوع
جذاك الله خيرا على الموضوع
محمد طويله
جزاكم الله خيرا اخوانى
ولكن ..............
أنا بدأت اصنع علف وأنا عندى 10 امهات فقط
وكثيرمن الأصدقاء اتهمونى بالجنون لذلك
ولكن الحمد لله الأمر مستقره وبخير
فمش مهم العدد على قد ما هو مهم الرغبه فى النجاح والإصرار عليه
ابويوسف
شكرا لكل من تعلم معلومة ولم يبخل بها شكرا للباشا
islam500022
جزاك الله خيرا
ولكن الجداول مش شغاله
لو امكن ارسالها علي الايميل [ندعوك للتسجيل في المنتدى أو التعريف بنفسك لمعاينة هذا الرابط]
eman mohamed
موضوع اصابنى بالذهول من شدة ترتيبه وسهولة قراءته وفهمة

اللهم بارك هذا الموضوع ينم عن خبرة واسعة

بالتوفيق ان شاء الله
remove_circleمواضيع مماثلة
privacy_tip صلاحيات هذا المنتدى:
لاتستطيع الرد على المواضيع في هذا المنتدى