بتعملوا اية فى انقطاع الكهرباء؟

نفس المواعيد فى المنصوره

عن نفسى لما النور يقطع بقول كلمتين
الأولى / أستغفر الله العظيم
والثانيه / حسبى الله ونعم الوكيل

عندى بيقطع اربع مرات فى اليوم
وبقول منكم لله
وحسبى الله ونعم الوكيل

بس بأمر الله الموضوع ده مش هيدوم كتييير
لأن عندنا أمبارح كانوا قاطعين طريق بلبيس العاشر عشان الموضوع ده
بلد اسمها العصلوجى الناس بتقول ان النور بييجى 3 او 4 ساعات فى اليوم فقط
وبصراحه عندهم حق وفى الاخر
(حسبى الله ونعم الوكيل فيهم )

دى فى الجمهورية كلها معقولة دى مقصودة ولا مفيش نظام

أنا عن نفسي إشتريت مولد يخدم البيت والأرانب لأني زهقت من القرف اللي
احنا عايشين فيه كل يوم ده .

والله معاك حق استاذ اسامة

بس برده ده مش حل
فى ناس مش فى مقدرتها شراء المولد خالص (تعمل ايييييييه )
احنا عاوزين حل نهائى يقضى على الموضوع ده

هههههههههههههههههه اطلع اشتكى على الحكومة

بلال كتب:

بس برده ده مش حل
فى ناس مش فى مقدرتها شراء المولد خالص (تعمل ايييييييه )
احنا عاوزين حل نهائى يقضى على الموضوع ده

طيب يا يشمهندس إقترح حلول
ونناقشها في رأيي ده الحل العملي الواقعي المتاح
وبالنسبة للمقدرة المولد 1 كيلووات في الأيام
العادية بيعمل حوالي 450 جنيه يعني مبلغ مش ضخم
قياسا لأنك هتشغله ساعتين في اليوم يعني
هيعيش معاك فترة طويلة
أما الحلول الاحتجاجية وقطع الطرق وسب الاخوان والرئيس
فابقي قابلني لو ده حل الموضوع وغير كده لو اتحل في مكان بالطريقة دي
عمره ما هيتحل في كل الأماكن أما الحلول الابتكارية فأتمني نشوف
حد من إخوانا المبدعين يقدم حلول ناجعة غير مكلفة .

معنى كده ان حضرتك لو حصل اى حاجه تانيه فى البلد وأتفرضت علينا زى موضوع انقطاع الكهرباء ده
هتستسلم للأمر وتشوف حل شخصى لحضرتك فقط
ولا لازم الناس تتكلم وتعدل الاوضاع
حضرتك فى ناس لحد دلوقتى (تحت خط الفقر )
وفى الاخر (لو حضرتك شايف ان ده حل )
( أنا أسف (حضرتك غلطاااااااااان )
لأن الموضوع مش على النطاق الشخصى ده موضوع عام
(الجيل بتاعنا هو اللى أسقط نظام كامل وغيره )
انما الجيل القديم أستسلم للوضع

لكن أحنا لأ
وبالتوفيق ان شاء الله

بلال كتب:

معنى كده ان حضرتك لو حصل اى حاجه تانيه فى البلد وأتفرضت علينا زى موضوع انقطاع الكهرباء ده
هتستسلم للأمر وتشوف حل شخصى لحضرتك فقط
ولا لازم الناس تتكلم وتعدل الاوضاع
حضرتك فى ناس لحد دلوقتى (تحت خط الفقر )
وفى الاخر (لو حضرتك شايف ان ده حل )
( أنا أسف (حضرتك غلطاااااااااان )
لأن الموضوع مش على النطاق الشخصى ده موضوع عام
(الجيل بتاعنا هو اللى أسقط نظام كامل وغيره )
انما الجيل القديم أستسلم للوضع

لكن أحنا لأ
وبالتوفيق ان شاء الله

مع كامل إحترامي لحماسك وثوريتك ولشخصك الكريم
إذا كنت حضرتك بتعتبرني غلطان ماشي ده رأيك
اللي أنا احترمه أنا قدمت حل من وجهة نظري
ومن وجهة نظر الجيل القديم المستسلم
لكن الكلام العصبي الناقم لا يقدم حلولا
الجيل بتاع حضرتك أسقط نظام كامل وغيره
أرجو من حضرتك تديني جدول زمني لإسقاط نظام الكهربا وتغييره
عشان الكهربا متقطعش تاني والدنيا تبقي حلوة لينا ولأرانبنا
لأن أكيد الأرانب متعرفش حكاية النظام والتغيير والاستسلام والكلام الكبير ده
فلو الحل اللي عند حضرتك هو قطع الطرق وتعطيل مصالح الناس
فكده الأرانب هتموت وهيتخرب بيت أبو الناس اللي بتاكل عيش من الموضوع ده
لكن لو عند حضرتك معلومة يقينية عن سبب إنقطاع الكهربا و إن الموضوع ده متعمد أو ناتج عن إهمال ....الخ
فلك حق الثورة وإسقاط نظام الكهربا وتغييره أنا ليست لدي مثل هذه المعلومات وحتي إن كانت لدي
فكما تفضلت وقلت إن الجيل القديم إستسلم وحضراتكم إسقطوا النظام فبالتالي يعمل إيه الجيل القديم لازم يستسلم
فأنا قررت الاستسلام وشراء المولد وكلي أمل في الجيل الجامد إنه يسقط نظام الكهربا ويظبط المسائل
وبالتوفيق إن شاء الله .

كلام مظبوط يا أستاذ محمد
لكن الباشمهندس أسامه طبعا مع حفظ فرق السن اللى بحترمه طبعا وبحترم المهندس اسامه جدا جدا
(الأختلاف فى الرأى لا يفسد للود قضيه )
لكن يا بشمهندس حضرتك بتكلم على أضرار انقطاع الكهرباء بالنسبه للأرانب فقط
لكن انا بتكلم على الناس واللى كتيييير من زمايلى منشغلين بالموضوع ده واللى (أن شاء الله مش هيدوم كتيييير )
وفى الاخر يا باشمهندس اسامه حضرتك لو زعلت منى فى موضوع فرق الاجيال
(أنا أسف جدا جدا )
ده من اللى جوايا واللى جوه كل مصرى أن كان شاب أو كبير
و أنا أتشرفت بمعرفه حضرتك جدا
وأتشرفت ان الاستاذ محمد شرف الموضوع بمشاركته

انا اشكركم جميعا اولا على تشريفكم موضوعى
ثانيا احب اقول انا استاذ اسامة معاة حق واستاذ بلال بردة معاة حق
استاذ اسامة معاة حق انة يدور على حل ويحل مشكلتة بدل مايقعد يسب ويسخط ودة من حقة وكمان استاذ بلال معاة حق لان اولا
المشكلة دى عامة فى الجمهورية كلها مش فى منطقة ولا اتنين وكمان مشكلة محدش عارف ليها حل اذن دى مشكلة نظام قائم مش عارف يعمل حاجة بل العكس بيتخبط ويترنح وبيجرب ودة مش المامول من نظام بعد 25 يناير دة النظام الفاسد ال قبلة مع كل ال فية مكنش بيحصل كدة فى عهدة يبقى دى غلطة نظام ولازم يتحاسب بسببها ولو مش قادر يبقى يرحل دى مفيش فيها كلام معتش حد هينضحك علية زى قبل الثورة
على العموم ال نقصدة من الموضوع دة بصفة عامة هو معرفة كيفية تصرف الفرد فى المشكلة ورؤيتة فى حلها والمناقشة عشان نعرف الاسباب ال من خلال ال واضح ان الاسباب واحدة وسبب المشكلبة معروف
يبقى المهم ازاى نعرف نحل المشكلة بصورة عاجلة عشان نمشى نفسنا ودة ال عملة استاذ اسامة وازاى نحل المشكلة بصفة عامة من الجذور ودة ال بيقول علية استاذ بلال
وفى النهاية اشكر استاذ محمد طويلة على تحليلة الموضوعى للمشكلة وشرح طبيعة وضع الشعب المصرى
بالتوفيق لكم جميعا

بقول ايه
هو مش فى محلات بتوزع أسلاك نت على البيوت بمقابل شهرى ثابت
إيه رايكم نعمل الفكره دى
واحد ابن حلال يكون معاه فلوس يعمل محطه كهرباء بقدره معقوله
ويوزع منها على البيوت
ماتبقاش فكره كويسه وفيها مصلحه ماديه بالنسبه لصاحب المحطه

أنا هاكتفي بإعلان إحترامي الكامل لأخي بلال
وتقديري لرأيه ولحماسته
ولواسع الأفق أ/ محمد ولصاحب الموضوع أ /عبد السلام .

يزيدنى شرف والله يا استاذ أسامه
وأنا كمان بحترم حضرتك جدا جدا ولتانى مره (أنا أسف بجد )