بسم الله الرحمن الرحيم
كتير من المربيين بيحصنوا بالايفوماك على اعتقاد ان التحصين بالايفوماك هيمنع الجرب
طب تعالوا فى الاول نعرف يعنى ايه تحصين وبناءا عليه نعرف هل الايفوماك تحصين ولا لا
التحصين بنستخدمه عموما فى الامراض الفيروسية وبعض الامراض البكتيرية التى يصعب علاجها
طب التحصين نفسه بقى بيكون عبارة عن ايه ؟
عبارة عن اننا بنجيب الفيروس او البكتريا المسببة للمرض ونموتها او ننزع منها ضراوتها وندخلها الجسم فهى تروح منبه الجهاز المناعى للجسم ويبدأ يعمل اجسام مضادة للجرثومة فاذا تعرض الجسم للعدوى سارعت هذه الاجسام المضادة بالالتفاف حول الميكروب واوقفت تكاثرها واحداثها للمرض.وحتى لو حدث المرض فانه سيكون اخف وطاة لو مكنش فى تحصين سابق للمرض
طب الجرب بقى المسبب ليه ايه ؟
حشرة صغيرة من نوع العتة اى انها طفيل خارجى بيتطفل على الاجزاء الخارجية للجسم او الاذن ويسبب المرض فالبالتالى ملهوش تحصين لانها حشرة يعنى مش فيروس و بكتريا
طب والايفوماك وظيفته ايه ؟
بيعمل على طرد الديدان والطفيليات الخارجية يعنى مش بيحفز جهاز المناعة ضد الجرب ولا غيره لانه مفهوش صفات التحصين اللى قلناها فى الاول
طب وبعدين كدة مفيش وقاية من الجرب ؟
لا فيه انك تنظف العنبر بصفة دورية
وترش العنبر بالديزانون او البيوتكس
وتعمل تطهير للعنبر سواء باليود او بغيره من المطهرات
طب امتى بقى نستخدم الايفوماك ؟
فى حالة الاصابة فقط وبالجرعة المحددة
اتمنى تكونوا غيرتوا رأيكم عن فكرة التحصين بالايفوماك
نقاط تستحق التوضيح .
محمد-حسنالثلاثاء يونيو 23, 2015 6:50 pm