تعبت جدا

1- السلام عليكم..
2- نورتنا واهلا بيك..
3- تربيه الارانب دى بمثابة (مدارس) أو وجهات نظر.. وكل مدرسه تعتمد على افكار واساليب معينه قد يراها اصحاب مدرسه اخرى انها خطأ تماما.. والعجيب انه كله فى النهايه بيوصل لنفس الغرض.. بعض الناس مثلا يتبعون برامج دوائيه قد لا يخلو يوم من دواء يضاف على الماء وأكيد أن حضرتك قرأت أحد هذه البرامج (اللى تعقد فى نظرى) والبعض الاخر يقول انا لا استخدم اى ادويه سوى التحصينات أم كل الامراض استخدم علاجات طبيعيه معها كالحلبه والثوم وحبة البركه وما الى ذلك.. ودا بيربى وشغال والتانى بيربى وشغال..
علشان ما تتوهش نفسك.. (مش تتوه بالشرقاوى)..
اولا.. تحصين فيروسى كل سنه او ستة اشهر حسب نوعه ان مستورد او مصرى.
ثانيا.. تحصين بكتيرى كل 3 شهور (وفيها خلاف بين اصحاب المدارس)
ثالثا.. تحصين جرب.. ولو النظافه عندك كويسه وبترش الارانب والبطاريات كل 10 ايام با ستخدام بيوتكس (1سم / لتر) معتقدش انك تحتاج الى تحصين ضد الجرب (ايفوماك بمعدل 2 شرطه يعنى0.2 سم للارنب)
رابعا.. كل 15 يوم تضع لمدة 3 أيام مضاد كوكسيديا (مثل كوكسى كيور) على الماء وفى اليوم الرابع سترات بوتاسيوم (غسيل كلوى).
الاربعه دوول تبقا انت تمام التمام ان شاء الله وهو ما قل وكفى..
لكن ألف باء فى تربية الارانب.. سلاله جيده.. وعلف جيد.. (ويضيف أحد اصدقائى وربنا يكفيك شر الحسد)..
عندك علف سوبر رابت والمصريه وأيبكس كويسين.. وعند تغيير نوع العلف اخلط شويه من القديم على شويه من الجديد حتى لا تحدث صدمه عند التغيير تسبب اسهال.
المفروض أن الارنب بعد شهر من الفطام يوصل وزنه 1500 جرام ومعدل التحويل للعلف الجيد 200 جرام فى الاسبوع..
ومعدل وضع العلف 100 جرام للارنب فى اليوم على وجبتين صباحا ومساءا.. وتزداد الكميات للامهات العشار والمرضعات.
دى نقاط مختصره وربنا يوفقك وان شاء الله أكمل لك بعد النقاط الاخرى..
ومع الوقت ستزداد خبره لكن اقتصر على تلك البرامج الدوائيه منعا للتشتت مبدئيا..
مع ان المفروض احنا نستفيد منك..!!!!!
وبالتوفيق يا دكتووووووووووووووووووووور

ربنا يوفقك يادكتور وبجد كلام استاذ عمرو كلام ماقل ودل وميتهيأليش انك هتكون محتاج اكتر من كده في البدايه والخبره هتيجي مع الوقت بالنسبه بقي للدكاتره البيطريين اللي انا المفروض اتحسب عليهم فدول ربنا ما يوريك يااستاذ عمرو بجد بنكون متخرجين من الكليه لانفقه شئ في الطب البيطري وكأننا كنا بندرس تجاره او حقوق بس طبعا الكلام ده خليه في سرك يااستاذ عمرو مش للنشر

الى الخ ميمو بفبما اننا طلعنا بلديات حيث اننى من اجا فأحب ان اقدم نصيحه بسيطه جدا ولاتستهين بها والله انا أنشأت مشروع بطاريات ارانب وخسرت فيه لسبب واحد ( الحسد) لا تضحك فالمشروع كانت كل بوادره ممتازه والولدات كثيره وعندما دخلت امرأة عليهم ورأتهم شهقت والباقى لن احكيه لك
توكل على الله ولكن لايدخل مكانهم الااقل القليل الثقه لكى يعتاد الارانب على رائحتهم ولا يخافو منهم
وايضا ربنا يكفيك شر الحسد

شكرا استاذ عمرو علي التوضيح
البرامج الدوائية كتير
المهم ان الواحد يمشي علي برنامج مناسب للحالة
مش كتر دوا والسلام....
ومحدش بيبتدي مشروع الارانب وهوا خبير...حتي لو دكتور...الموضوع بييجي مع الممارسة
والكل بيرحب باي حد عندة اي استفسار للرد علية...واخونا عمر خير مرشد في التربية...ربنا يزيدة ويوفقة..ويبعد عنة الحسود..امين

1- أختنا د/ .. (مدرج تحت اسم شيتوس)..
شكرا على ذوقك.. وطبعا مساوىء التعليم المصرى لا حصر لها.. والخبره هى الفيصل..
2- أختنا الفاضله الكبيره.. (مدرج تحت اسم شمس)..
ربنا يعوض عليك ومحدش بيتعلم للاسف ببلاش.. إن شاء الله ربنا يوسع عليك.. وعلى فكره مشاركاتك رائعه.
3- أخونا سمسم.. ( oso)..
العفو ياباشا.. دا احنا تلاميذ عند حضرتك.. والواحد بيرد باستحياء عند وجودك.. ربنا يزيدك..
4- أخونا الجديد د/ .. (meemo)..
نكمل يا عمنا..
طبعا حضرتك هتبتدى بمجموعه صغيره.. ودا كويس جدا.. لأنك فى البدايه هتلخبط كتير (وربنا يصبر الارانب عليك.. مش بعيده يعتصموا فى التحرير من أول جمعه يقضوها معاك) وهتستفيد كتير من أخطاءك.. يعنى مثلا معرض لأنك تدى حقنه غلط أو بسن مش نضيف فيطلع لكام أرنب خراريج وتدخل فى دوامة تنظيفها واللذى منه.. وعلشان كده خليك اقتصادى جدا فى الادويه.. لو علفك كويس هيغنيك عن اضافة الاملاح والفيتامينات.. عموما الفيتامينات.. فيتامين أد3هـ 1سم / لتر فى ماء الشرب لمدة 3 أيام .. والاملاح .. أكمافوس 4سم / لتر على ماء الشرب لمدة 3 أيام.. مع وجود يوم فاصل بين الاملاح والفيتامينات وكرر كل اسبوعين مثلا.. لكن لو تعرف حد فى منطقتك بيصنع علف بنفسه ويعتمد عليه أفضل لك خد منه وريح نفسك.
تماما كده..
وتحط للارنب 50 جرام علف صباحا و50 مساءا.. وظبط الماء حتى لا يحدث لهم امساك اذا لم يكن امامهم ماء باستمرار.. وممكن تضيف على العلف عيش مدشوش يوفر شويه معاك وينصح به للامهات.
معايا انت..
وتعمل كراسه عندك للارانب تكتب فيها مواعيد التحصينات الدوريه ومواعيد عرض الاناث على الذكور.. والمواعيد المرتقبه للولاده.. ويفضل الجس بعد 10 ايام من عرض الانثى على الذكر حتى يسهل عليك تمييز الصغار عن الزبل.. وطبعا تعرف كل أم اي ذكر اللى عشرها عشان لو هتربى من الصغار امهات تتجنب تزاوج الاقارب كى لا تضعف السلاله.. ولا تنسى أن تحقن الام 1 سم تيراميسين طويل المفعول بعد الولاده مباشره.. وبعد الولاده بيومين احقنها 2 سم مثلا كالديماج مدر للبن اذا كانت خلفتها كبيره وممكن تكرره تانى بعد يومين.. ولو الام خلفتها اقل من 6 عشرها بعد الولاده مباشرة ان كانت صحتها جيده.. والا اتركها 10 ايام.. ويتم الفطام على سن 30 يوم (ودى مسألة خلاف) بس خلينا على 30 يوم كويس.. ويوم الفطام صوم الارانب المفطومه لمدة 12 ساعه الا من الماء.. ويتم وضع لهم العلف بكميات صغيره تزداد تدريجيا لتصل الى 100 جرام للارنب فى اليوم.
تمام..
لا تنسى أن تتفقد صغار الارانب فى الايام الاولى للولاده وتأكد أن الام ترضعهم.. غالبا ترضعهم أخر الليل.. ستجد بطن الارنب منتفخه ويظهر اللبن من جلد الارنب الشفاف.. وافحصهم وتفقدهم لان أحيانا يموت احدهم ويتعفن لو لم تتفقدهم او يخرج احدهم وينزلق بين السلك فيموت.. دا فى أول 10 ايام بس.. وعند عمر 17 يوم تقريبا ضع علافه للارانب الصغيره بحيث تتعود على الاكل من العلف.
وطبعا نسيت اقول لك ان تضع قش فى الولاده قبل ميعاد الولاده اللى انت كاتبه عندك فى الكراسه بحوالى 5 ايام حتى تتعود الام على الولاده وتمهد القش استعدادا للولاده.
أخيرا عشان عاوز أنام..
احتمال وارد ان تحصل ليك مشاكل تخليك تتعقد.. وارد طبعا ان ده يحصل.. وبصراحه لفت انتباهى انك تكتب أول مشاركه ليك بعنوان ((تعبت جدا)) كان المفروض حسب تسلسل الاحداث تكون بعد شهرين مثلا.. ما علينا المهم.. خليك صبوووووووووووووور..
حلو الكلام..

واسمع كلمتين مختصرتين فى العضل قرأتهم لزملاء فى المنتدى الجميل ده..
اولا.. اذا كنت بدأت هذا المشروع بحثا عن أرباح دون أن يكون لديك حب لهذا المخلوق الجميل فابحث عن مشروع أخر أكثر ربحيه.
ثانيا.. كلمة أختنا د/ هدير..
أيوه بحبهم.. بس مش على حساب مكسبى منهم.. الأم اللى شغاله أهلا بيها.. واللى مش شغاله توسع لغيرها.
وازن بين الجملتين.. وربنا يوفقك.. ودمت بخير.

انا ليا تعليق صغير بالنسبه ان التحويل 200جرام اسبوعيا مش مظبوط
اما 4 سم اكما فوس علي التر غلط جدا
النقطه الاولي ان الارنب بتفطم علي 600 جرام ده الي بيربي مظبوط اما اعرف ناس بتفطم 400 جرام
المهم العلف المظبوط جدا يحول 200 جرام اسبوعيا اما الباقي فانت عارف ياعمرو
بالنسبه للاملاح النشره عليها بتقول نصف سم علي التر يعني الزجاجه علي 200 لتر

شكرا علي معلوماتك القيمة مستر عمر عقبة..
بالنسبة لموضوع الجرامات في الفطام عادي
وكذللك بالنسبة لاضافة الاملاح او غيرة ....مسموح حتي 5 اضعاف الجرعة وكمان الدوا معادتش بيتصنع بكفائتة
يعني ايفوماك المفروض ال 1 سم ل 50 كيلو
احنا ممكن ندية لحاجة 3 كيلو
وطويل المفعول 1 سم ل 20 كيلو
وبردو بندية ل 3 كيلو
لازم نعمل كدة عشان نحصل علي نتيجة مرجوة
كلام عمرو صح الصح
اعذروني كان لازم اعقب عالنقط دي لان في ناس بتمشي عالمكتوب في النشرات ومعظمة كلام نظري مش عملي الا فقط في التحصينات..
وتقبلو مروري

موضوع الوزن في الفطام مش عادي بتفرق كتييييييييييييييير
انا اتكلمت عن الاملاح فقط لان الزياده في الجرعه الارنب مابشربش وبالتالي مابيكولش وهي
الصح انها تنزل اسبوع متواصل من نصف سم الي واحد سم

الأخ العزيز محمد الروبى..
الأخ اللذيذ سمسم..
ما على إلا أن أحترم رأيكم.. وعذرا إن كنت قد تكلمت بحضرتكم.. لأن العين ما تعلاش على الحاجب.. بس كل الحكايه إن صاحبنا كان متعقد مسبقا وحبيت أبسط له الأمور وأديه فكره مبسطه.. وربنا يوفق الجميع.
ومعلومة الأملاح 4سم/ اللتر.. دى أنا واخدها من المنتدى ومن ناس ثقه واتأكد من الرابط ده..
[ندعوك للتسجيل في المنتدى أو التعريف بنفسك لمعاينة هذا الرابط]
ولكم خالص شكرى وتقديرى
أخوكم الصغير

ياعم عمرو كل واحد بيتكلم براحته انت جربت 4 سم علي التر الارنب مش هيشرب والله
انا علقت لافاده مش موضوع عين وحاجب

هههههههه طبعا نتقبل مرورك غصب عننا.. مش مديرنا وكبيرنا دا حتى اللى مالوش كبير بيشتر له كبير.. بس معلش يا كبير.. أبو علوه ما كنش فى الحوار..

وعليكم السلام


انصحك بتربية الأرانب بس حافظ على الشروط العنايه والنظافه