من ضمن أسباب رفض الأنثى للتلقيح الأسباب التاليه
1ـ حداثه سن الأنثى ونقص نمو الأعضاء التناسليه عندها
2ـ وجود إلتهابات فى المبايض أو الرحم أو عنق الرحم
3ـ ارتفاع درجه الحراره فى الصيف وهذا يجعل الأنثى أقل رغبه فى التلقيح
4ـ تربيه الذكور مع الإناث فى جماعات وليس فى أقفاص متفرده والمهندسبن بينصحوا
إن تربيه الإناث من الممكن (فى حالات الضروره) تربيتها فى جماعات مع مراعاه وجود أماكن للولاده بنفس عدد الإناث
يعنى لوعندك 5 إناث على الأرض لازم يكون موجود فى نفس المكان خمس أماكن للولاده أما الذكور فالأفضل أن يكون
كل ذكر فى قفص منفرد لزياده ترغيب الأنثى فى الذكر
5ـ من الممكن أن يكون الخوف سبب رئيسى فى عدم قبول الأنثى للتلقيح حتى لو كانت الأنثى قديمه
وولدت أكثر من مره لأن وقتها بيكون الخوف سبب عارض
زى ما يكون فى عند الجيران فرح والدى جى شغال طول الليل ممكن تيجى تلقح الأنثى بالليل تلاقيها رافضه التلقيح
رغم إن عمرها ما رفضت ـ فقط هو الخوف من الحاجه الجديده اللى أول مره تتعرض ليها هو اللى سبب ليها ده
طيب لو النثى لا خايفه ولا صغيره فى السن ولا مريضه ولا عندها أى حاجه ممكن تخليها ترفض التلقيح
وكمان هانفترض انك نزلتها لذكر مدرب وجاهز
[ندعوك للتسجيل في المنتدى أو التعريف بنفسك لمعاينة هذا الرابط]
وإن القفص مستدير وليس مربع حتى لا تلصق مؤخرتها بركن القفص
زى الأقفاص دى
ورغم كل ده رافضه التلقيح وده طبعا دلع سخيف إحنا مش محتاجينه طيب نتصرف إزاى
كتير من المربين الخبره فى التربيه بيستعملوا الأستك فى تلقيح الإجبارى
أستك عادى جدا زى بتاع البيجامات موجود عند أى عطار وفى الأسواق
و بيستعملوه بإنهم يربطوا ذيل الأنثى بالأستك ويشدوا الذيل من أعلى الأرنبه وبنفس اليد الممسكه للأستك
يتم إمساك الأرنبه من الأذنين مع جزء من فراء خلف الرقبه واليد الأخرى بيتم حمل الأرنبه بها وتقديمها للذكر
من فتحه جانبيه للقفص أو بيشيلفوا العلافه ويدخلوا الأنثى من مكان العلافه مع رفع مؤخره الأرنبه قليلا
لإعطاء فرصه للذكر أن يقوم بالتلقيح
لكن بيقابلهم مشكلتين
الأولى ممكن يكون الذكر بيرفض الأنثى المربوطه ويبقى كده ماعملناش حاجه
والمشكله الثانيه ممكن الذكر يطلع بأظافره على إيدك ويخربشك وانت أكيد مش محتاج تتخربش
أو حتى يتعمد يخربشك علشان تترك الأنثى
والحل مع الأنثى اللى بتتدلع الدلع السخيف ده هو برضه الأستك بس الإختلاف فى طريقه استخدامه
بدل ما تمسك الأرنبه بالأستك بالطريقه دى هانعمل طريقه أخرى
1 ـ نقوم بربط الأستك لتكوين حلقه كامله به (دايره)
2ـ طرف الدائره يتم تثبيته فى ذيل الأنثى ليس بالربط وإنما نعملها (شنيطه)
ووصفها انك تطبق الأستك المعمول دائره وتيجى على الطرف المتنى و تثنيه على نفسه مره أخرى لكن بعكس تطبيقه الأستك الأولى وبعد شد الأستك والتأكد من ثباته فى ذيل الأنثى
نأتى للطرف الثانى من الأستك نثبته على ظهر الأنثى بحيث تدخل كل قدم من الأقدام الأماميه للأرنبه بجانب من الدائره
ويتصل الجانبين من الأعلى خلف رقبه الأنثى
يعنى كأنك بتلبسها شنطه المدرسه
والنتيجه هى أنثى (متكتفه) من كل ناحيه وذيلها مرفوع وقابله للتلقيح حتى لو كانت رافضه
ومجرد ما تنزل للذكر بيعتليها على طول
بس المهم لو انت فى الظروف العاديه بتقدم الأنثى للذكر مرتين فى ظروف التلقيح الإجبارى قدمها للذكر 4 مرات
مثلا مرتين بعد الفجر ومرتين فى العشاء أو ثانى يوم مثلا لأن نتيجه التلقيح الإجبارى هى 50 % كما يؤكد الكثير من المربين والخبراء
يا رب أكون قدرت أوصل المعلومه
قبل أى شئ أنا متأسف جدا جدا جدا على التأخير فى موضوع الصور
ويارب تكون الصور واضحه ومبينه الأمر بسهوله
صوره ـ 1
طبعا لأنى مش اعرف اوضل الأمر على ذيل الأرنبه فاستعملت قلم واعتبروا القلم هو الذيل
وده شكل الأستك المربوط على القلم (ذيل الأرنبه)
صوره ـ 2
وده شكل الأرنبه وهى مربوط فيها الأستك واللى مايعرفش الربطه دى بتتعمل ازاى مش مهم
المهم انك تربط الأستك فى الذيل بأى ربطه تعرفها ويكون الأستك بنفس الشكل الدائرى اللى فى الصوره
صوره ـ 3
ده شكل الأرنبه من الأعلى وهى ملفوف الأستك حواليها الأجناب باينه وواضحه
والأستك من على الظهر أنا رافعه بإيدى علشان يبقى واضح فى الصوره
زى ماقلنا كأنها بتلبسها شنطه المدرسه
صوره ـ 4
ده شكل الأرنبه من الخلف ـ الوضع اللى بتنزل بيه للذكر ذيلها مرفوع ومشدود للأعلى
من غير ما تمسكها بإيدك وبفضل الله الذكر بيلقحها على طووووووووول
ونأسف على التأخير مره تانيه وعلى عدم جوده الصور
بكره ربنا يكرم بموبايل احسن من كده
بس لو في صورة لطريقة التكتيف دي تبقى كملت جميلك علينا
احمد عرابيالأربعاء ديسمبر 07, 2011 2:29 am