حكـــــــاوى هــــــــاوى ـــــــــــــ الحلقة الثالثة ــــــــــ الاستاذ احمد احمد سعد

السلام عليكم ورحمة الله وبركاته

اهلا بيكم فى الحلقة الثالثة من برنامج ـــــ حكـــاوى هــــاوى ـــــ ضيفنا وضيفكم النهارده مشرف ادارى اقسام الارانب رجل ذو خلق كريم ويحب روح التعاون والمودة اجتماعى بطبعه وده

اللى شفناه من خلال مشاركاته فى المنتدى وكذلك تعاونه مع اعضاء المنتدى الجدد والقدامى فى نشر المعلومة الصحيحة والاخذ بيد المبتدئين والاجابة على استفساراتهم

ضيفنا وضيفكم **** احمد احمد سعد ***

ان شاء الله تعجبكم الحلقة متبخلوش علينا بتعليقاتكم واقتراحاتكم

وجزاكم الله خيرا

بداية اهلا بيك يا استاذ احمد لو تسمحلنا نتعرف على حضرتك اكتر وعلى بداية قصة عشقك للارانب واقتراحات حضرنك لتطوير الهواية فى مصر وكذلك تطوير المنتدى من خلال الاسئلة القادمة:-





1. الاسم السن العنوان المهنة؟


الاسم /احمد احمد سعد السن/34 سنه العنوان/ المرج القاهرة العمل/رئيس وردية بمحطة كهرباء

***************************************************************************************************************************

2. كلمنا عن بدايتك مع هواية تربية الارانب؟


بداية التربية معايا كانت سنة 94 لما والدتى قررت اننا نربى ارانب وانا غاوى تربية جميع الطيور المنزليه والحيوانات

***************************************************************************************************************************

3. اول مكان ربيت فيه الارانب كان بطاريات ولا كان مكان عادى ارضى ؟ ولو ارضى كلمنا عن مواصفات المكان من حيث ازاى قدرت تسيطر على نضافة العلف والمايه وخلافه من مشاكل التربية الارضية؟


اول مكان ربيت فيه كان بطاريات رأسى ومازلت محتفظ بيها لغاية دلوقتى وعلى فكرة جدتى كانت مربية ارانب بلدى ارضى وكانت بتحطلهم برسيم فقط من غير ميه ولا اى حاجه تانيه وكانوا كويسين وزى الفل

***************************************************************************************************************************
4. بدات تربية بكام ارنب؟

بدأت تربية بنتايتين وذكر

***************************************************************************************************************************
5. اول ارنبة ولدت عندك كام ؟

اول ارنبه ولدت عندى 9 وكنا فرحانين اوى بيهم الحمد لله ان الذاكرة شغاله الكلام ده من 19 سنه

***************************************************************************************************************************
6. اكتر ارنب اتعلقت بيه ومش ناسيه لحد دلوقت ؟

اكتر ارنب اتعلقت بيه ام شنشلا كانت وش الخير علينا كانت اول واحدة تولد عندنا ولما ماتت زعلت عليها جدا ومكنتش عايز أرميها

***************************************************************************************************************************
7. اول مرض واجهته فى تربية الارانب ؟ واتصرفت معاه ازاى ؟

-اول مرض واجهنى كان الجرب وانا ساعتها كنت مربى حمام فجبتلهم ايفوماك من السوق بالسنتى وحقنتهم والحمد لله خفوا وبقوا كويسين

***************************************************************************************************************************
8. اكتر مشكلة واجهتك فى تربية الارانب؟


اكتر مشكلة واجهتنى هى الفئران كانت بتاكل الارانب اللى لسه مولودة كلها ومتسبش ارنب حى كانت لازم تموتهم كلهم حتى لو مأكلتهمش وبسببها بطلت تربية فى فترة من الزمن بس الحمد لله عالجتها وقفلت المكان كويس والحمد لله

***************************************************************************************************************************
9. فى البدايات كنت بتاكل الارانب ايه؟

انا من ساعة ما ربيت وانا بأكل علف فقط

***************************************************************************************************************************
10. تجربتك مع الاعلاف ؟ كلنا عانينا الكتير مع الاعلاف.

كنت بجيب علف عادى معرفش اسمه زمان فى البداية وبعد كده استعملت ايبكس وكان ماشى معايا كويس لفترة وبدأ يسوء فغيرت كام نوع مفيش فيهم حاجه ظبطت معايا لحد ما استعملت علف الاستاذ محمد طويله والحمد لله كويس جدا معايا والاوزان ما شاء الله ممتازة امهات وخلفات

***************************************************************************************************************************
11. كلمنا عن اول مرة بعت فيها ارانب من انتاجك؟


عادى انا ببيع لمحلات الفراخ بس مش كتير علشان اغلب الارانب بدبحهم فى البيت لانى بحب اكل الارانب جدا

***************************************************************************************************************************
12. كيف تعرفت على المنتدى؟؟

كنت ببحث عن معلومات عن الارانب ولاقيته

***************************************************************************************************************************
13. ماتتمنى ان تراه فى المنتدى؟


الحمد لله منتدى الارانب للجميع من افضل منتديات الارانب فى مصر والوطن العربى وهو كده ممتاز والناس اللى فيه احسن ناس اتعرفت عليهم

***************************************************************************************************************************
14. اقتراحاتك لتطوير تربية الارانب فى مصر؟

عمل بورصة لتحديد سعر ارانب اللحم يومية تقدر بسعر العلف ومصاريف الانتاج من ادوية وخلافة يعنى مش العلف يغلى والسعر يفضل زى ماهوه والمربى يشيل الليلة لا يبقى فى نسبة وتناسب بين الاتنين &تكوين رابطة (مع انه صعب) لاستيراد السلالات الجيدة من الخارج وبسعر التكلفه مش بمكسب والاجتماع الدورى بينهم لبحث مشاكل المربين الصغار

***************************************************************************************************************************
15. راى حضرتك فى تطبيق اساليب التربية الاجنبية فى مصر من حيث الرعاية والتغذية وخلافه واستيراد سلالات من الخارج؟

ممتاز طبعا بس صناعة الارانب فى مصر مش واقفه على حيلها للتشجيع على تطبيق الاساليب الاجنبية بس لو الصناعة دى بقت كويسة فى مصر اكيد الكلام ده هيكون ممتاز جدا وده لعدة اسباب منها ان جو مصر حلو للتربيه والسياحه عامل مساعد لسحب انتاج المربين

***************************************************************************************************************************
16. كلمة توجهها لاعضاء المنتدى؟


افضل شيىء لاقيته فى المنتدى ان الناس اللى فيه بتحترم بعضها وبتسمع رأى بعضها ومفيش واحد بيتعالى على التانى وياريت يدوم الاحترام بينا ونفضل كده دايما
كلمة ليك بقى احب اشكرك على الفكرة الرائعه دى وربنا يبارك فيك وبالتوفيق دايما يا رب.


*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*

الف شكر استاذ احمد نورتنا النهارده


جزاك الرحمن خيرا



دى كانت نهاية الحلقة الثالثة من برنامج حكاوى هاوى نلقاكم فى الحلقة القادمة على خير


دمتم فى حفظ الله وأمنه