التربيه الأرضى
تربيه ناجحه ولكن بشروط
كتير من الناس بتحب تربيه الأرانب وكل اللى بيربوا بينصحوا ان التربيه لازم تكون فى بطاريات
ليه بطاريات ؟
لأنها الأكثر جدوى اقتصاديا
تحافظ على نظافه الأرانب
تعتبر وقايه لأرانب من الإصابه بالكثير من الأمراض والحشرات
يستطيع المربى ان يسكن عدد كبير فى مكان صغير بالمقارنه مع التربيه الأرضى
يعنى التربيه الأرضى فاشله ولا ايه ؟
طيب اللى معندوش بطاريات أو ظروفه مش سامحه يشترى مايربيش ؟!!!!
شروط التربيه الأرضى الناجحه
أولا / المكان
لابد أن يكون جيد التهويه قليل الرطوبه
ثانيا / الأرضيه
لابد ان تكون الأرضيه من الأسمنت ولا تصلح أبدا الأرض الطينيه لسهوله وجود الرطوبه فيها وبلل واتساخ الأرانب
وظهور الكثير من الحشرات على رأسها البراغيث
ثالثا / النظافه
مره كل يوم ولو مرتين فى اليوم يبقى احسن
رابعا / التسكين (وركز فى اللى جاى لأن ده المهم جدا)
# لابد من توفير عدد بيت ولاده (سواء من الطوب او الزواليع ) بنفس عدد الأمهات
يعنى لو 5 أمهات يبقى فى المكان عدد 5 بيوت للولاده
# الذكور ـ لابد من توفير مكان منفصل لكل ذكر لوحده لأن وجود الذكر وسط الأمهات يصيبه بنوع من البرود
غير انه لما يجرى ورا أنثى للتلقيح وهى لسه والده غالبا بتستخبى منه فى عشه الولاده ولو دخل وراها يبقى الخلفات هاتموت
# طيب نلقح الأنثى إزاى ؟
إما انك تاخدها للذكر بالليل وتاخدها من عنده الصبح أو إنك تفضل واقف لحد ما تشوف التلقيح تم بعينك
# الأمهات كل واحده بتحدد بيتها وتعرفه وبالتالى الخلفات ورا امهم فلما تلاقى الأم عشار وقربت تولد لازم تشيل الخلفات اللى حجمها كبر وتبعدهم فى مكان منفصل علشان مايحصلش تزاحم أو اجهاد على الأمهات
# لازم يكون لكل فئه مكان محدد معزول عن الباقيين (الأمهات والذكور شرحناها) إناث الإحلال فى مكان لوحدها وكذلك التسمين والأرانب اللى اتفطمت جديد علشان أرانب التسمين ماتضربهاش
خامسا / عدم خلط اى نوع تربيه آخر مع الأرانب (بط ـ حمام ـ فراخ ....)
سادسا / تأمين المكان جيدا جدا من اى فئران او حيوانات أو طيور قد تؤذى الأرانب
ميزه التربيه الأرضى
انها تعطى الأرانب الحريه التى خلقها الله عليها وهذا الأمر كفيل برفع مناعه الأرانب بشده وزياده مقاومتها للأمراض
بشرط الحفاظ على المكان نظيف وجاف
ومتابعه الرش بالمطهرات باستمرار مرتين فى الأسبوع
مره باليود علشان البكتيريا ومره بالديزانون علشان الحشرات
والتغذيه طبعا لازم تكون علف جيد ومش شويه برسيم ودراوة وبواقى اكل البيت
عيب التربيه الأرضى الوحيد فى رأيى الشخصى
هو ان المكان اللى هاتربى فيه ارضى مش هياخد عدد امهات كبير زى ما تربى فى بطاريات
وكمان هاتحتاج نظافه مرتين فى اليوم ومتابعه شديده جدا جدا وده اجهاد وارهاق على المربى
حفظكم الله
صلاح الهنداوىالخميس أبريل 30, 2015 11:12 pm