نموذج لتركيبة علف

ياريت نسب الكراويه والبقدونس والفحم والحجر الجيرى ومضادات السموم ومضادات الكوكسيديا

رأيى من رأى ابو شبل

شكرا أ\مينا
بس كنت منتظر توضيح عن الاضافات اكثر من كده وبرده تنوع في تركيبه العلف
وياريت طلب أ\ شبل

Mina Garas كتب:

مساء الخير يا شباب

دى تركيبة العلف اللى كتت قلت لكم عليها

بس هو فى نقطة عايز اقولها قبل ما اكتبها ان لتركيبات العلف انواع كتير و فى نماذج كتير و طبعا ده متوقف على سعر الخامات و مدى توفرها يعنى ممكن الخامات اللى هاكتبها مش متوفرة عند البعض فلو ده حصل يا ريت تقولوا لنا ايه الخامات المتوفرة عندكم و نحاول نظبطها مع بعض

دريس برسيم حجازى 500 كجم
كسب فول صويا 150 كجم
ذرة 150 كجم
ردة 200 كجم
اجمالى 1000 كجم

التركيبة دى هاتبقى حوالى 19 % بروتين و 2650 كيلو كالورى طاقة حوالى 15 % الياف خام



و زى منتوا شايفين التركيبة دى ل 1 طن

بنحط 200 جم كبريتات نحاس على الطن لان دى بتقوم بدور المضاد الحيوى
نضيف 0.5 % من الطن علف ملح طعام مزود باليود يعنى حوالى 5 كجم
الخلط يتم مع اضافة مولاس او زيت بنسبة 3 % من وزن طن العلف يعنى حوالى 30 كجم
و طبعا ما تنسوش البريمكسات و دى انواعها كتير و كميتها المضافة على العلف بتبقى مكتوبة عليها لانها بتختلف على حسب تركيزها

يا رب الموضوع يفيدكم

يا ريت اللى شايف ان الخامات دى مش متوفرة عنده و عايز يغيرها بخامات تانية متوفرة يقول لنا ده و نتناقش فيها و شكرا

ايه يا عم الحلاوة دي،،،بس التركيبة دي بسيطة اوي،،انا بقرأ حاجات معقدة،،يا ترى انت ناسي حاجة ولا انا مش واخد بالي،،مشكور على اي حال،،ومجهود رااائع،،،

أبو شبل كتب:

ياريت نسب الكراويه والبقدونس والفحم والحجر الجيرى ومضادات السموم ومضادات الكوكسيديا

انت عايز ليه تحط كراوية و بقدونس انا عارف ان فى ناس كتير بتحب تحط اعشاب على العلف بس انا مش منهم بصراحة من ناحية تانية انت مش هاتحط كراوية انت هاتحط تبن كراوية و ده هايخفض القيمة البروتينية لان نص التركيبة دريس برسيم حجازى مرحلة ما قبل الازهار مش تبن و طبعا القيمة البروتينية للبرسيم الحجازى اعلى من اى تبن لاى حاجة تانية

بخصوص الفحم انا مش عارف مين اللى قالك ان العلف بيتحط له فحم دى جديدة بالنسبة لى بصراحة حتى ما اخدتهاش فى الكلية

بخصوص الحجر الجيرى ده مصدر للكالسيوم و انت كده كده هاتضيف بريمكس و ده عبارة عن مخلوط املاح و فيتامينات و كمان بتحقن الام كالديماج عند كل ولادة و كمان بتنزل املاح فى المية بشكل دورى فا مش محتاج حجر جيرى . الحجر الجيرى بيستخدم مع الفراخ اكتر خصوصا البياضة مش مع الارانب

بالنسبة لمضادات السموم و الفطريات و كمان الكوكسيديا انا ممكن اكتب لك اى كمية و السلام و ساعتها هاتقولى الله ينور بس الحقيقة انى ساعتها هاكون باغشك غير كده الحاجات دى فى منها انواع كتير بتركيزات مختلفة و منها المستورد و المحلى ومنها اللى بيتحط مع علف الارانب يعنى بيتحمل حرارة الكبس و منها اللى بيتحط على علف الفراخ اللى بيتخلط بس مش بيتكبس فهمت قصدى و عشان كده يفضل تشوف النوع اللى هاتستخدمه محلى و لا مستورد و تضفيه بالكمية المكتوبة على الشيكارة من بره

نقطة اخيرة بخصوص موضوع الاعشاب معظم الحاجات دى زى تبن الكراوية و الحلبة و خلافه بخلاف انها تبن يعنى قيمتها الغذائية منخفضة هى فيها مواد عطرية هى اللى بتديها الريحة بتاعتها و الريحة دى بتبقى نتيجة مواد اسمها زيوت عطرية و دى بتتكسر بحرارة المكبس عشان كده شايف انها ملهاش لزمة اما بخصوص المفعول السحرى للاعشاب دى فمن غير زعل 90 % منه ضحك على الدقون


انت اللى يهمك فى العلف الخاص بالمرضعات ان نسبة البروتين الخام ما تقلش عن 18 % و ان البروتين المهضوم فى نفس العليقة ما يقلش عن 15 %
و ان الطاقة ما تقلش عن 2600 كيلو كالورى فى الطن و ان نسبة الالياف ما تقلش عن 14 % و الدهون نسبتها ما تقلش عن 4 - 5 % و شطارة اللى بيركب علفته انه ينقى الخامات اللى تحقق احتياجات الارانب و فى نفس الوقت باقل سعر

انت لو حابب تضيف ضيف حمض امينى ميثوينين و ليسين بس ده هايرفع لك تمن طن العلف

و فى النهاية احب اقولك ان تركيبات العلف دى وجهات نظر و مدارس

و ربنا يوفق الجميع

ايه يا عم الحلاوة دي،،،بس التركيبة دي بسيطة اوي،،انا بقرأ حاجات معقدة،،يا ترى انت ناسي حاجة ولا انا مش واخد بالي،،مشكور على اي حال،،ومجهود رااائع،،،[/quote]

يا باشا ربنا يخليك بس انا ليا سؤال يعنى ايه بسيطة ؟؟؟ ممكن تجيب لنا حاجات من اللى انت بتقول عليها معقدة دى و كلنا نستفيد من بعض يا باشا

بصراحه احنا احتارنا
مش عارفين مين الصح
مع احترامى طبعا لكلامك يا استاذ مينا
لكن بجد احنا عملنا زى الحمامه اللى جالها روشه
مش عارفين ان كان كلامك هو اللى صح ولا التركيبات التانيه هى اللى صح
( )

بسم الله


كيف اخى مينا

اولا موضوع رائع وجميل

بس انا مختلف معاك فى اهمية اضافة الاعشاب خاصة البقدونس ،،، مش عايز اقولك فيه فوائد اد ايه للكائن الحى

بصفة عامة مش للارانب بس ،،، واكيد حضرتك استاذ فى المجال وانا عارف حضرتك من قبل ماادخل انا المجال

وعارف اد ايه ان ارتفاع قيمة العلف الغذائية بتوفر ثمن الدواء وتكلفة المرض ،،،

النقطة الاهم ،،

ايه رايك باضافة البلوبانك فى علف الارنب ؟؟؟!!

تمام ياباشمهندس مينا وشكرا لسرعه ردك
بس اعذرنى على اسئلتى الكتير وخصوصا انك استاذ فى التركيبات وعايز تعطى اللى عندك واحنا بدورنا لازم نستغلك ههههههههههههههههههه
حبيبى ياهندسه
الفحم ياباشا بيضاف على العلف عشان الانتفاخات ودا موجود فى العلف اللى عندى وسألت صاحب التركيبه قالى عشان الانتفاخ وبالفعل حالات الانتفاخ قليله جدا تكاد لاتذكر
بالنسبه للاعشاب لها فوائد كتيره تجعلها عنصر اساسى فى التركيبه وابسط شئ البقدونس والحلبه فواتح شهيه ومدر للبن
اضافات مضادات الكوكسيديا والادويه وخلافه اعرف ان كل حاجه لها تركيزها زى ما حضرتك قلت بس ايه هو افضل حاجه تنصح بيها من فيتامينات ومضادات كوكسيديا وخمائر .... وياريت اسماء الشركات المصنعه

بلال كتب:

بصراحه احنا احتارنا
مش عارفين مين الصح
مع احترامى طبعا لكلامك يا استاذ مينا
لكن بجد احنا عملنا زى الحمامه اللى جالها روشه
مش عارفين ان كان كلامك هو اللى صح ولا التركيبات التانيه هى اللى صح
( )

على فكرة الموضوع مش محير و لا حاجة هات التركيبة اللى انت بتتكلم عنها و نقارنها ببتاعتى و نشوف ممكن نضرب الاتنين فى بعض و نطلع بحاجة جديدة و كله يستفيد

HOUSAMMI كتب:

بسم الله


كيف اخى مينا

هى كيف دى بقت بدل كيفك و لا ايه ههههههههههه على العموم يا سيدى انا كويس الحمد لله

اولا موضوع رائع وجميل

بس انا مختلف معاك فى اهمية اضافة الاعشاب خاصة البقدونس ،،، مش عايز اقولك فيه فوائد اد ايه للكائن الحى

يا باشا انا مااختلفتش معاك على فوايد البقدونس بس لما التركيبة يبقى فيها دريس برسيم حجازى يبقى اى حاجة تانى معاه تكاليف زيادة و بعدين هاتحط اد ايه لازم يبقى العلف يحقق كل احتياجات الارنب باقل التكاليف و ده رائى

بصفة عامة مش للارانب بس ،،، واكيد حضرتك استاذ فى المجال وانا عارف حضرتك من قبل ماادخل انا المجال

طب معلش يا ريت تفكرنى بحضرتك

وعارف اد ايه ان ارتفاع قيمة العلف الغذائية بتوفر ثمن الدواء وتكلفة المرض ،،،

النقطة الاهم ،،

ايه رايك باضافة البلوبانك فى علف الارنب ؟؟؟!!

انا ما اعرفش البلوبانك بصراحة عشان افيدك فيه

أبو شبل كتب:

تمام ياباشمهندس مينا وشكرا لسرعه ردك
بس اعذرنى على اسئلتى الكتير وخصوصا انك استاذ فى التركيبات وعايز تعطى اللى عندك واحنا بدورنا لازم نستغلك ههههههههههههههههههه
حبيبى ياهندسه

يا عم اسال براحتك كلنا لازم نفيد بعض بس فى نقطة عايز اصلحهالك انا لا استاذ و لا بتاع من حيث انى عايز اعطى كل اللى عندى فالموضوع دينى حبة لان فى مبدا بيقول مجانا اخذتم مجانا اعطم و انا لما كنت مبتدىء فى الارانب كنت كل ما احتاج حاجة كنت بلاقى ناس بتساعدنى و ببلاش فاعتقد انى لازم برده اساعد اللى محتاج على اد ما اقدر

الفحم ياباشا بيضاف على العلف عشان الانتفاخات ودا موجود فى العلف اللى عندى وسألت صاحب التركيبه قالى عشان الانتفاخ وبالفعل حالات الانتفاخ قليله جدا تكاد لاتذكر

و منكم نستفيد يا باشا بس انا ليا سؤال شكل الفحم فى العلف بتاعك بيكون عامل ازاى يعنى هل العلف بيبقى لونه قالب على اسود و لا ايه

بالنسبه للاعشاب لها فوائد كتيره تجعلها عنصر اساسى فى التركيبه وابسط شئ البقدونس والحلبه فواتح شهيه ومدر للبن

انا ما اختلفتش معاك بس لما يبقى فى دريس برسيم حجازى الكلام ده يتوفر افضل و ليا سؤال معلش هو الحلبة و البقدونش بيتضافوا فى شكل ايه

اضافات مضادات الكوكسيديا والادويه وخلافه اعرف ان كل حاجه لها تركيزها زى ما حضرتك قلت بس ايه هو افضل حاجه تنصح بيها من فيتامينات ومضادات كوكسيديا وخمائر .... وياريت اسماء الشركات المصنعه

بص يا باشا انا بقالى فترة بعيد عن المجال بس لما كنت فيه انا كنت باحب اتعامل مع شركة اجريفيت و دى شركة مصرية و هى اللى بتصنع و كان عندهم ميزة انك لو هتاخد كمية كويسة ممكن يعملك تركيبة زى منتا عايز

شكرا ياباشمهندس وبالنسبه للفحم يضاف قطع صغيره زى كسر الذره كده بس بنسب قليله جدا
والبقدونس والحلبه بيضافو ازاى دى بتاعتك انت ياباشا اللى تقولنا
وبالنسبه لشركات الادويه كمان احنا مستنيين منك موضوع عن الشركات الثقه فى مصر اللى مش بتضرب الخامات بتاعتها وبصقتك كنت مشرف على مزارع قبل كده هتكون عارف احسن شركات فى مصر وكمان المستورد

مفيش اسهل من كده بس فين خط الانتاج ولا حناكل ازاى؟؟

ياريت اعرف اجيب التركيبه بس انا بشترى العلف من مزرعه واحد زميلى
وهو أكيد مش هيقولى على التركيبه بتاعته

بلال كتب:

ياريت اعرف اجيب التركيبه بس انا بشترى العلف من مزرعه واحد زميلى
وهو أكيد مش هيقولى على التركيبه بتاعته

محدش بيقول على تركيبته لحد بس كويس انه بيديلك منها وخلاص

أبو شبل كتب:

شكرا ياباشمهندس وبالنسبه للفحم يضاف قطع صغيره زى كسر الذره كده بس بنسب قليله جدا
والبقدونس والحلبه بيضافو ازاى دى بتاعتك انت ياباشا اللى تقولنا
وبالنسبه لشركات الادويه كمان احنا مستنيين منك موضوع عن الشركات الثقه فى مصر اللى مش بتضرب الخامات بتاعتها وبصقتك كنت مشرف على مزارع قبل كده هتكون عارف احسن شركات فى مصر وكمان المستورد

يا باشا شكرا على موضوع الفحم

بخصوص البقدونس انا اول مرة اسمع منكم انه بيتضاف على العلف بس اكيد بيتضاف ناش زى دريس البرسيم الحجازى بس برده هارجع و اقولك ما دام العلف فيه 50 % دريس برسيم حجازى اى حاجة تانى ملهاش لزمة

بخصوص الحلبة انا كنت اعرف ناس بتضيف التبن بتاعها يعنى اللى بيفضل من الزرعة بعد حصاد حبوب الحلبة اما لو عايز تضيفها حبوب زى الذرة شوفها الاول سعرها كام و هاتضيف منها اد ايه عشان تعرف هل العلف هايكون مجدى اقتصاديا و لا اغلى من اللى فى السوق

بخصوص موضوع الشركات انا كنت رادد فوق بس يظهر انت مش اخدت بالك انا بافضل شركة اجريفيت لان حاجاتها نضيفة و دى شركة مصرية و بتصنع منتجاتها فى مصر و هى شركة مكملات غذائية مش ادوية و كمان عندهم ميزة كانوا عرضوها عليا قبل كده انك لو عايز تعمل تركيبة فيتامينات بتركيزات غير اللى هم بينتجوها مكن يعملوهالك بس تتفق معاهم على الكمية معلش بقى انا عن نفسى معنديش عقدة الخواجة و باحب المنتج المصرى

بلال كتب:

ياريت اعرف اجيب التركيبه بس انا بشترى العلف من مزرعه واحد زميلى
وهو أكيد مش هيقولى على التركيبه بتاعته

يا استاذ بلال الموضوع اللى احنا فيه دلوقت كان مربوط بموضوع تانى بيتكلم عن فكرة لحل مشكلة العلف باشتراك اكتر من عضو يكونوا بيربوا كميات قليلة فى مكبس علف صغير انتاجيته 50 كجم فى الساعة و ده رابط الموضوع

[ندعوك للتسجيل في المنتدى أو التعريف بنفسك لمعاينة هذا الرابط]

حضرتك قولتلى ياريت تجيب مكونات العلف اللى انا بستعمله
وانا رديت على حضرتك قولتلك
(ياريت اعرف اجيب التركيبه بس انا بشترى العلف من مزرعه واحد زميلى
وهو أكيد مش هيقولى على التركيبه بتاعته)
لتوضيح ان انا مش عندى تركيبه بس مش أكتر
وشكرا لحضرتك على الموضوع الجميل

السلام عليكم و رحمة الله و بركاته ،،،

الأخوة الأعزاء في هذا المنتدى أود أن أقيم هذه التركيبة من حيث المواد الغذائية ودون الرجوع للمضافات من أملاح و فيتامينات و مضادات حيوية ،،،

طبعا قمت بالعودة إلى معهد الدراسات الأستراتيجية في روسيا ووجدت لديهم دراسة مبسطة و مفصلة لحاجات الأرانب لكل يوم و حسب العمر و الوزن الحاجة من الأرنب و ذلك من السعرات الحيوية و البروتين و ملح الطعام و الفوسفور و الكالسيوم والكاروتين.

قمت في بحثي بوضع جدول يبين احتواء كل نوع من الأعلاف من المواد الموجودة أعلاه ووجدت التالي:
1- وجدت بأن هذه الخلطة ممتازة في فصل الصيف لإنخفاض السعرات الحرارية فيها.
2- هذه الخلطة تحتوي على كل ما ذكر من السعرات الحيوية و البروتين و الفوسفات و الكالسيوم و الكاروتين و بالكميات المطلوبة ولكن لفئة الإناث التي تتحضر للإخصاب، وهي وسط بين التركيبات.
3- يمكن أن نخفض من كمية فول الصويا لتصبح 100 كغم في مقابل زيادة الذرة المجروشة بكمية 50 كغم وذلك لتغذية الصغار من عمر 30و حتى 60 يوم ،وهذا أيضا ينطبق على الأمهات و الذكور في فترة الراحة.
4- يمكن أن يتم إضافة كمية 50 كغم من فول الصويا لكل طن من التركيبة السابقة بمقابل تقليل كمية الذرة المجروشة بكمية 50 كيلو غرام و ذلك في حال الأمهات الحوامل و المرضعات و في حال الصغار من عمر 60 يوم و حتى النضوج.
5-دعونا لا ننسى بأن نضيف بعض المواد التالية وذلك لتمام صحة الأرانب و عافيتها وبكمية مناسبة:
أ- ملح الطعام و بكمية 5 كغم للطن كما ذكره الأخ الكريم.
ب-5 كيلو من الحلبة ان وجدت
ج-5 كيلو من الحبة السوداء
د-3 كيلو من اليانسون للإنتفاخات
ه-5 كيلو من العسل الأسود لأن الأرانب تحب الطعم الحلو.

يرجى ملاحظة التالي:
أولا: التراكيب الموجودة بالسوق تراعي دائما السعر و لا تراعي الجودة و هي ليست بالضرورة أن تكون مدروسة أو مرتبطة بمركز للأبحاث.
ثانيا: لابد أن نضع بالميزان تعليقات البعض والتي تشكك بالمقادير و التركيبات بهدف الإستمرار بشراء البضاعة الموجودة بالسوق علما بأننا ننطوي حاليا تحت منظومة رأسمالية تنادي و تدعم الإحتكار و الكسب السريع و الكبير بالوقت الذي يبقي للآخرين الفتات ليس كرما منهم ولكن ليبقى الآخر عبدا نشيطا و داعما لسيده.
ثالثا: أنا من مربي الأرانب الألمانية العملاقة (فليمش جيانت) في الأردن و أستخدم حاليا أعلاف البقر الحلوب بالإضافة للبرسيم الحجازي ونتائجي ممتازة، و أبحث عن مكبس للأعلاف لأجرب التركيبة أعلاه و سأزودكم بالنتائج حالما أحصل عليها.
رابعا: أطالب الأخوة بمصر بتزويدي بأسعار المواد حسب التركيبة الأصلية لأحسب الكلف و الفائدة المرجوة منها وإذا كان من الأفضل تبديل مادة مكان أخرى.

وتفضلوا بقبول الإحترام ،،،

عبدالرحمن أبوجبل
مسلم
أعيش بالأردن
و
عيني على فلسطين

ألف شكر ليك أ-عبدالرحمن
وتحيه خاصه لكل أهل الأردن

محمد المقود كتب:

الاخ الكريم مينا لى كم سؤال

اولاً: رايك فى التركيبة دى على حساب انها ( 1 طن )

350 ك برسيم

استفسار هل البرسيم ده دريس و لا تبن و برسيم مصرى و لا حجازى

60 ك شعير
40 ك ذرة
170 ك فول صويا
330 ك رده
30 ك مولاس

30 كجم مولاس كتير اوى اوى اقصى كمية 5 كجم لان المولاس بالكمية دى مع حرارة الكبس هايخلى العلف ناشف جدا على سنان الارانب و مش هايرضى يا كلوه و خلى بالك الهدف من المولاس انه يعمل كرابط بين مكونات العلف و يعمل عملية التصبيع للعلف مش اكتر من كده

=========
12.800 كيلو جرام حجر جيرى

اشمعنى الكمية دى ليه مش 15 كجم ليه مش 10 كجم

3 كيلو ملح طعام

ملح الطعام بيكون 0.5 % من وزن العلف يعنى حوالى 5 كجم

3 كيلو فيتامينات
1.100 كيلو جرام ميثيونين

هو كيلو كويس بس السؤال بكام لان اللى اعرفه ان الميثيونين و الليسين تمنهم عالى

200 جرام ليسين

ثانياً : ممكن اسماء او الشركات الخاصه
( بالفيتامينات - ميثيونين - ليسين )
المضافه على العلف اثناء الكبس

بخصوص الفيتامينات و الاملاح بتاع شركة اجريفيت انما الميثيونين و الليسين بصراحة مش عارف مش استخدمتهم قبل كده

ثالثاً : انت كاتب فى المشاركة ( بنحط 200 جم كبريتات نحاس على الطن لان دى بتقوم بدور المضاد الحيوى )
منين اجيب كبريتات النحاس وتدرج تحت اسم ايه لما احب اروح اجبها

بص كبريتات النحاس شوفها فى شارع الجيش


رابعاً : بالنسبة لاضافه اخرى انت كاتب عنها فى المشاركه
( طبعا ما تنسوش البريمكسات و دى انواعها كتير و كميتها المضافة على العلف بتبقى مكتوبة عليها لانها بتختلف على حسب تركيزها )
ممكن تكتب لينا افضل الانواع والشركات الى تستخدمها ومنين نجبها

يا باشا البريمكسات هى الفيتامينات و الاملاح و انا رديت عليها فوق

وجزاك الله كل خير وارجو ان لا اكون اطلت عليك

لا يا باشا مفيش تطويل انا تحت امرك
وممكن لو اضافه على الفيس بوك
لانى واخد حظر وباقى 14 يوم
ولا استطيع ارسال رساله خاصه او الاضافة