نموذج لتركيبة علف

عبدالرحمن أبوجبل كتب:

السلام عليكم و رحمة الله و بركاته ،،،

الأخوة الأعزاء في هذا المنتدى أود أن أقيم هذه التركيبة من حيث المواد الغذائية ودون الرجوع للمضافات من أملاح و فيتامينات و مضادات حيوية ،،،

شكرا لتقييمك مجهودى المتواضع و اتمنى من حضرتك التفاعل معى فى بعض النقط اللى هاكتبها تحت

طبعا قمت بالعودة إلى معهد الدراسات الأستراتيجية في روسيا ووجدت لديهم دراسة مبسطة و مفصلة لحاجات الأرانب لكل يوم و حسب العمر و الوزن الحاجة من الأرنب و ذلك من السعرات الحيوية و البروتين و ملح الطعام و الفوسفور و الكالسيوم والكاروتين.

انا عايز حضرتك تحط لنا هنا لاحتياجات الارانب المذكورة فى الدراسة دى لانى متوقع انها هتناسب ارانب روسيا اكتر ما هتناسب ارانب مصر

قمت في بحثي بوضع جدول يبين احتواء كل نوع من الأعلاف من المواد الموجودة أعلاه ووجدت التالي:
1- وجدت بأن هذه الخلطة ممتازة في فصل الصيف لإنخفاض السعرات الحرارية فيها.

انا مختلف معاك شوية فى النقطة دى لان التركيبة السعرات الحرارية اللى فيها 2600 كيلو كالورى و دى تقريبا احتياجات الام المرضعة طبقا لتوصيات منظمة ال FAO العالمية فلو 2600 كيلو كالورى مناسب لفصل الصيف طب فى فصل الشتا المفروض نرفع الطاقة فى العلف طب طبقا لكلام حضرتك المفروض تكون كام مع الاخذ فى الاعتبار ان شتاء مصر مفهوش ثلوج بعكس شتاء روسيا فان كانوا فى الدراسة رافعين الطاقة فى العلف فده عشان يدفوا ارانبهم فى الصقيع اللى عندهم اما بالنسبة لشتاء مصر دفاية شمسية من بتاعة الفراخ بتفى بالغرض فمن وجهة نظرى مش محتاج ارفع الطاقة اكتر من كده عشان ما اقعش فى فخ ان الامهات تسمن و تكون دهون فى منطقة الرحم و ده معناه ان الام مش هاتخلف او مش هاتدينى الانتاج المطلوب منها

2- هذه الخلطة تحتوي على كل ما ذكر من السعرات الحيوية و البروتين و الفوسفات و الكالسيوم و الكاروتين و بالكميات المطلوبة ولكن لفئة الإناث التي تتحضر للإخصاب، وهي وسط بين التركيبات.

معنى كلام حضرتك ان التركيبة دى تنفع مع السلالات طب عشان نفيد الناس اكتر ايه هى النسب المطلوبة للامهات المرضعة مع العلم ان احتياجات الام المرضعة هى الاعلى فى كل حالات تغذية الارانب و رجاء ذكر السلالات اللى بتطبق عليها الدراسة دى لان ظروف السلالات بره غير فى مصر خالص لانى اعتقد ان المواصفات الاعلى اللى حضرتك بتتكلم عنها هاتستخدم مع الارانب كبيرة الحجم زى الفلمنش جاينت

3- يمكن أن نخفض من كمية فول الصويا لتصبح 100 كغم في مقابل زيادة الذرة المجروشة بكمية 50 كغم وذلك لتغذية الصغار من عمر 30و حتى 60 يوم ،وهذا أيضا ينطبق على الأمهات و الذكور في فترة الراحة.

حضرتك مش محدد ايه المقصود بفول الصويا هل هو حبوب فول الصويا و لا كسب فول الصويا مع العلم ان كسب فول الصويا الشائع فى مصر نسبة البروتين فيه 44 % انا هافترض انك بتتكلم عن كسب فول الصويا انا غيرت الكميات زى ما حضرتك قلت يعنى خليت كمية فول الصويا 150 كجم و كمية الذرة 150 كجم و ادونى نفس كمية الطاقة و اللى هى 2650 كيلو كالورى لان تقريبا الطاقة اللى فى الذرة و كسب فول الصويا واحدة و اللى هى حوالى 3500 كيلو كالورى تقريبا

4- يمكن أن يتم إضافة كمية 50 كغم من فول الصويا لكل طن من التركيبة السابقة بمقابل تقليل كمية الذرة المجروشة بكمية 50 كيلو غرام و ذلك في حال الأمهات الحوامل و المرضعات و في حال الصغار من عمر 60 يوم و حتى النضوج.

النقطة دى زى اللى فوق بالظبط انا مش فاهمها بصراحة فياريت توضحها اكتر

5-دعونا لا ننسى بأن نضيف بعض المواد التالية وذلك لتمام صحة الأرانب و عافيتها وبكمية مناسبة:
أ- ملح الطعام و بكمية 5 كغم للطن كما ذكره الأخ الكريم.
ب-5 كيلو من الحلبة ان وجدت
ج-5 كيلو من الحبة السوداء
د-3 كيلو من اليانسون للإنتفاخات
ه-5 كيلو من العسل الأسود لأن الأرانب تحب الطعم الحلو.

فى نقطتين الاولى سؤال هل الكميات دى فوق ال 1000 كجم يعنى بعد ما احسب خامات العلف اللى هاحتاجها هاضيف الاضافات دى و لا الاضافات دى محسوبة ضمن ال 1000 كجم ؟؟؟
النقطة التانية هى توضيح مش اكتر و هى ان العسل الاسود مش بيستخدم فى تصينع العلف بيستخدم الصورة الاخف منه و اللى معروفة باسم المولاس و بيتضاف مش عشان حلاوة الطعم لا بيتضاف عشان يربط خامات العلف ببعضها بالاضافة لان نسبة الطاقة فيه مرتفعة و فى ناس بتبدله بزيت انا شفت ناس قبل كده بتكبس بميه

يرجى ملاحظة التالي:
أولا: التراكيب الموجودة بالسوق تراعي دائما السعر و لا تراعي الجودة و هي ليست بالضرورة أن تكون مدروسة أو مرتبطة بمركز للأبحاث.

انا متفق معاك فى النقطة دى بس لازم تراعى السعر فى تركيبتك عشان جدوى المشروع مش اكتر يعنى مثلا حاجة زى جلوتين الذرة نسبة البروتين فيه عالية جدا حوالى 60 % لكن سعره عالى برده ممكن لو استخدمته فى العلف يرفع لى تمن طن العلف بشكل يرفع التكاليف بشكل عالى و فى نفس الوقت سعر اللحم فى السوق هايفضل زى ما هو و ده معناه انى هاخسر

ثانيا: لابد أن نضع بالميزان تعليقات البعض والتي تشكك بالمقادير و التركيبات بهدف الإستمرار بشراء البضاعة الموجودة بالسوق علما بأننا ننطوي حاليا تحت منظومة رأسمالية تنادي و تدعم الإحتكار و الكسب السريع و الكبير بالوقت الذي يبقي للآخرين الفتات ليس كرما منهم ولكن ليبقى الآخر عبدا نشيطا و داعما لسيده.

كلامك مظبوط 100 %

ثالثا: أنا من مربي الأرانب الألمانية العملاقة (فليمش جيانت) في الأردن و أستخدم حاليا أعلاف البقر الحلوب بالإضافة للبرسيم الحجازي ونتائجي ممتازة، و أبحث عن مكبس للأعلاف لأجرب التركيبة أعلاه و سأزودكم بالنتائج حالما أحصل عليها.

ممكن تقول لنا ايه هى النتايج الممتازة اللى انت بتحققها لتعم الفائدة

رابعا: أطالب الأخوة بمصر بتزويدي بأسعار المواد حسب التركيبة الأصلية لأحسب الكلف و الفائدة المرجوة منها وإذا كان من الأفضل تبديل مادة مكان أخرى.

نصيحة شوف سعر العلف فى بلدك لان الاسعار فى مصر حاليا فى كل حاجة استثنائية



وتفضلوا بقبول الإحترام ،،،

عبدالرحمن أبوجبل
مسلم
أعيش بالأردن
و
عيني على فلسطين

محمد المقود كتب:

الاخ الكريم مينا

انا احب اشكرك على سرعة الرد والتفاعل

يا باشا لا شكر على واجب

وجزاك الله كل خير وجعلة فى ميزان حسناتك

اشكرك

بس انت رديت على سؤالى الاول
استفسار هل البرسيم ده دريس و لا تبن و برسيم مصرى و لا حجازى
هوا يفرق كتير وايه الفرق بين كل دول ما كلهم برسيم

الفرق كبير طبعا
الدريس بالبلدى كده عبارة عن البرسيم قبل مرحلة الازهار يعنى قبل ما يعمل زهر و بعد كده يكون تقاوى بيتنشف بحيث يفضل الورق موجود على العود بس ناشف و فايدة الدريس ان تركيز البروتين فيه بيبقى اعلى من البرسيم الاخضر و ده ينفع يتعمل مع كل انواع البرسيم سواء مصرى او حجازى

التبن بالبلدى برده بعد ما البرسيم يعمل زهر و بعد كده التقاوى بيتم درس البرسيم عشان ناخد منه التقاوى و اللى بيفضل بعد عملية الدرس دى اسمه التبن و زيه زى تبن القمح و غيره

البرسيم الحجازى و اسمه بالانجليزى Alfa Alfa ده صنف غير الصنف المعروف فى مصر الحجازى بيقعد فى الارض من 3 - 5 سنين و بناخد منه طول سنة اما البرسيم المصرى بيقعد موسم واحد و اللى هو الشتا

اهم حاجة بقى ان دريس البرسيم الحجازى نسبة البرويتن فيه حوالى 18 % اما بخصوص البرسيم المصرى انا عن نفسى ما شوفتش حد بيعمله دريس لان معظم اللى بيستخدموه فى مصر بيفضلوا انهم ياكلوه اخضر اما بالنسبة لتبن البرسيم المصرى نسبة البرويتن فيه ضعيفة جدا حوالى 6 % و كمان الطاقة قليلة جدا حوالى 750 كيلو كالورى و ده حال كل الاتبان مش تبن البرسيم بس الياف عالية بروتين و طاقة قليلين و الافضل طبعا دريس البرسيم الحجازى و فى ناس فى مصر دلوقت بتزرعه و تنشفه و تطحنه و بتصدره بره

اما بالنسبة للرد على سؤالك عن
( 12.800 كيلو جرام حجر جيرى - 3 كيلو ملح طعام - 3 كيلو فيتامينات - 1.100 كيلو جرام ميثيونين )
دى التركيبة الى موجوده فى مشاركتى لاى طرحتها قبل كدا على الاعضاء للمناقشه
بس انا حولتها من 100 ك جرام الى 1 طن وعلى فكرة هى منقولة وانا طرحتها للنقاش
وده رابط المشاركة الاساسية للموضوع
[ندعوك للتسجيل في المنتدى أو التعريف بنفسك لمعاينة هذا الرابط]

اما بخصصو الرد على سؤالى وانت رديت
بص كبريتات النحاس شوفها فى شارع الجيش

معلش اتعب معاى شويا المادة دى سايبة ولا مغلفه
ومنين اقدر احصل عليها ومكانها فين تحديدا
لتعم الفائده ويستفاد الاعضاء الكرام

انا هاقولك على حاجة ممكن تفاجئك انى بقالى حوالى 4 سنين بره مصر و ما عرفش الوضع بقى ايه بعد الثورة فى الكيماويات بالذات انا لما كنت باحتاج الحاجات دى كان بيجبها لى واحد قريبى انما اللى انا عارفه ان كل الكيماويات زى كبريتات النحاس اللى بتستخدم فى العلف و برمنجانات البوتاسيوم اللى بتستخدم فى تطهير خطوط المية موجودة فى شارع الجيش اللى هو فى العتبة فمعلش اتعب و انزل اسال هناك

ولى سؤال اخير انت كبست بالتركيبة الى انت طرحها
وايه اخبار النتائج ونسبة التحويل كام
وللعلم انها تحتوى على 19 % برتين يعنى انا لا افضلها الا للامهات العشاير او قبل مرحلة بيع الانتاج باسبوع

وفترة الراحه وفترة 15 يوم الى بعد الفطام افضل يكون كمية البرتين المضاف للعلف هى 16 %
والا انت ليك راى تانى فى مسالة البروتين
ولو متفق معاى ياريت تقول لينا على تركيبه تعطينى 16 % بروتين

بص بخصوص نسبة البروتين انا جربت قبل كده علف مرضعات و علف تسمين و بصراحة ما لقتش فرق لان خصوصا لما يبقى العلف كويس بيوفر عليك كتير خصوصا مع الفطام انا عن نفسى بافضل انى اكل الفطام من علف المرضعات خصوصا لما يكون حجم المزرعة صغير لانك عشان تعمل علفتين واحدة تسمين و التانية مرضعات مع حجم مزرعة صغير ده وجع قلب بصراحة . وجهة نظرى انك عشان تستخدم نوعين علف واحد تسمين و التانى مرضعات لازم يكون حجم المزرعة ما يقلش عن 400 ام

اما بخصوص التركيبة اللى انت عايزها ان شاء الله هاعلمهالك و ابعتها لك
وانا اسف على الاطاله وكثرة الاسئلة
بس ادينا بندردش ولعله يكون خير
وجزاك الله كل خير وجعلة فى ميزان حسناتك

مفيش داعى للاسف كلنا لما دخلنا المنتدى ده مضينا عقد مش مكتوب باننا نفيد و نستفيد . بلدنا مش هاتطلع لقدام الا لما نساعد بعض